Օտարերկրյա պատվիրակությունները ժամանում են Թեհրան՝ Իրանի նախագահի երդմնակալության արարողությանը
Օտարերկրյա տասնյակ պատվիրակություններ հուլիսի 29-ից շարունակում են ժամանել Թեհրան՝ մասնակցելու նախագահ Մասուդ Փեզեշքիանի երդմնակալության արարողությանը։ Այս մասին հաղորդում է Mehr լրատվական գործակալությունը։
Թեհրան են ժամանել Տաջիկստանի նախագահը, Թուրքմենստանի փոխվարչապետը, Եգիպտոսի արտաքին գործերի նախարարը, Կատարի արտաքին գործերի փոխնախարարը, Տանզանիայի արտգործնախարարը, Մավրիտանիայի կառավարության պատվիրակը և մի շարք այլ երկրների ներկայացուցիչներ։
Փեզեշքիանի երդմնակալության արարողությանը ներկա գտնվելու համար հուլիսի 30-ի առավոտյան Թեհրան է ժամանել նաև ԵՄ արտաքին կապերի եվրոպական ծառայության գլխավոր քարտուղարի տեղակալ Էնրիկե Մորան։
Նախագահի երդմնակալության արարողությունը տեղի կունենա հուլիսի 30-ին Իրանի խորհրդարանում։ Մինչ այդ Մասուդ Փեզեշքիանին նախագահի պաշտոնում հաստատել էր Իրանի գերագույն առաջնորդ Ալի Խամենեին։
Նիկոլ Փաշինյանը նույնպես աշխատանքային այցով մեկնել է Իրան, որտեղ հանդիպում կունենա Մասուդ Փեզեշքիանի հետ, այնուհետև կմասնակցի երդմնակալության արարողությանը։
