«Կիպրոսի Հանրապետությունը 50 տարի ի վեր օկուպացված է». ԱՄՆ-ում ուղղափառ հունական եկեղեցու արքեպիսկոպոս
ԱՄՆ-ում կայացել է Կիպրոս թուրքական ներխուժման 50-ամյակին նվիրված միջոցառում: Միջոցառման ընթացքում ելույթ է ունեցել ԱՄՆ-ում ուղղափառ հունական եկեղեցու արքեպիսկոպոս Էլպիդոֆորոսը, ով մեղադրել է Թուրքիային Կիպրոսի օկուպացման մեջ: Այս մասին տեղեկացնում է ermenihaber.am-ը։
«Կիպրոսի Հանրապետությունը 50 տարի ի վեր օկուպացված է»,-նշել է նա:
Հատկանշական է, որ թուրքական մեդիայում արքեպիսկոպոս էլպիդոֆորոսը համարվում է ԱՄՆ-ում Ստամբուլի Ֆեների հունական ուղղափառ պատրիարքարանի ոչ պաշտոնական ներկայացուցիչ, իսկ նրա հայտարարությունը՝ «սկանդալային»:
Հիշեցնենք, որ 1974թ. թուրքական զորքերը ներխուժեցին Կիպրոս և կղզու հյուսիսային մասը զավթվեց թուրքական բանակի կողմից։ 1983թ. թուրքերն այդ տարածքում հիմնեցին, այսպես կոչված, «Հյուսիսային Կիպրոսի Թուրքական Հանրապետություն», ինչն ավելի ամրապնդեց բաժանումը։ Վերջինս պաշտոնապես ճանաչված է միայն Անկարայի կողմից, մինչդեռ կղզու հարավային մասում գտնվող Կիպրոսի Հանրապետությունը ոչ միայն ճանաչվեց աշխարհի մնացած բոլոր երկրների կողմից, այլև 2004թ. մայիսին դարձավ Եվրամիության անդամ։
