Օջախային ակցիաների հանգուցալուծումը պետք է լինի Երևանում, թատերաբեմը փողոցն է, թիրախը՝ ԱԺ-ն. Դավիթ Անանյան
Պետական եկամուտների կոմիտեի նախկին նախագահ Դավիթ Անանյանն այսօր միացել էր Տավուշում՝ Կիրանց-Ոսկեպար ճանապարհը փակած քաղաքացիներին։
168.am-ի հետ զրույցում Դավիթ Անանյանը դժվարացավ ասել, թե բողոքի այս ակցիաները կդառնա՞ն համապետական, թե՞ ոչ, սակայն նման ցանկություն ունեն։
«Սա միայն Տավուշի, Կիրանցի, Ոսկեպարի, Բաղանիսի և մյուս գյուղերի խնդիրը չէ, սա համահայկան և բոլորիս խնդիրն է։ Ես այսօր ուրախ եմ, որ ամբողջ Հայաստանում այսպես ստեպ-ստեպ, օջախային ինքնաբուխ ակցիաներ են տեղի ունենում։ Բոլորս հասկանում ենք, որ այս ակցիաներին միավորող թատերաբեմը Երևանն է, և Երևանում շատ արագ պետք է կապիտալիզացիայի ենթարկվի այս համընդհանուր օջախային շարժումները»,- նշեց Դավիթ Անանյանը։
Մեր զրուցակցի փոխանցմամբ՝ իրենց նպատակն է, որ սահմանազատումն իրականացվի առնվազն հայ ժողովրդի, պետության ու պետությունը ներկայացնող իշխանավորության ճիշտ կեցվածքով։
«Այսօր մեկնարկած սահմանազատումն ու սահմանագծումն իրենից ներկայացնում է հայրենիքը մաս-մաս հանձնելու մի գործընթաց, որին բոլորս դեմ ենք։ Այս օջախային ակցիաներն իրենց հանգուցալուծումը պետք է ունենան քաղաքամայր Երևանում՝ կարճ ձևակերպեմ, թատերաբեմը փողոցն է, թիրախը՝ Ազգային ժողովը, պետք է անհապաղ սկսել իշխանափոխության գործընթաց՝ օրենքին համապատասխան»,- շեշտեց Դավիթ Անանյանը։
Անդրադառնալով իշխանությունների, մասնավորապես՝ ԱԺ նախագահի՝ Ադրբեջանից գազ գնելու վերաբերյալ հայտարություններին, Դավիթ Անանյանն ասաց, որ այդ ամենը տեսանելի ապագայում հնարավոր չէ։
«Ադրբեջանից գազ գնելու համար պետք է տարրական համապատասխան ենթակառուցվածքներ ունենալ, որը գոյություն չունի։
Անվտանգային տեսանկյունից, եթե դու փաստացի քո թշնամուց էներգետիկ կախվածության մեջ ես գցում ամբողջ տնտեսությունը, ապա քաղաքական առումով քո երկիրը դարձնում ես վասալային երկիր»,- շեշտեց Դ. Անանյանը։
Մանրամասները՝ 168.am-ի տեսանյութում
