Վերին Լարսի անցակետը մի քանի ժամով փակվել է բեռնատարների համար
Վերին Լարսով Վրաստանից Ռուսաստան տանող ճանապարհը մի քանի ժամով փակվել է։ Պատճառը վրացական հատվածում կատարվող վերանորոգման աշխատանքներն են։
Այս մասին Sputnik Արմենիային հայտնել են Վրաստանի տարածաշրջանային զարգացման և ենթակառուցվածքների ավտոճանապարհների դեպարտամենտից։
«Ցերեկային ժամերին կցորդիչով և կիսակցորդիչով մեքենաների համար ճանապարհը փակ է լինելու։ Սահմանափակումը կապված է ճանապարհի որոշ հատվածներում տարվող աշխատանքներով»,- նշել են դեպարտամենտից։
Ընդ որում, ՌԴ ԱԻՆ Հյուսիսային Օսիայի Հանրապետություն-Ալանիա գլխավոր վարչության օպերատիվ հերթապահ Գերման Գաբարաևի տվյալներով՝ Վլադիկավկազ-Լարս հատվածում ծանր բեռնատար ավտոմեքենաների երթևեկությունը Ռուսաստանի Դաշնությունից դուրս գալու ուղղությամբ արգելվել է ապրիլի 19-ի ժամը 10։30-ից։
Նա նաև նշել է, որ սահմանափակումները կապված են Վրաստանի տարածքում Մցխեթա–Ստեփանծմբինդա–Լարս ճանապարհահատվածի վերանորոգման աշխատանքների հետ։
