Ալիևը ԵԽԽՎ-ին և եվրոպական կառույցներին մեղադրել է «կողմնակալության» համար
Եվրոպայի խորհրդի խորհրդարանական վեհաժողովում (ԵԽԽՎ) «Ադրբեջանի դեմ կողմնակալ ու կեղտոտ արշավ է սկսվել». Բուլղարիայի խորհրդարանի նախագահ Ռոսեն Ժելյազկովի հետ հանդիպման ժամանակ այս մասին հայտարարել է Ադրբեջանի նախագահ Իլհամ Ալիևը։
Նա շեշտել է, թե «Ադրբեջանի տարածքային ամբողջականության վերականգնումից հետո եվրոպական մի շարք կառույցներ լայնածավալ արշավ են սկսել Բաքվի դեմ… Այս քարոզարշավը տարվում է նաև Եվրախորհրդի խորհրդարանական վեհաժողովում, ինչն անընդունելի է»,- ասել է նա։
Հիշեցնենք, որ ԵԽԽՎ-ն հունվարի 24-ին որոշեց չվավերացնել Ադրբեջանի պատվիրակության լիազորությունները, և պատվիրակությունն առնվազն մեկ տարով հեռացվել է Վեհաժողովից:
Ադրբեջանցի պատգամավորներին Վեհաժողովից հեռացնելու առաջարկին հիմնականում դեմ էին քվեարկել Թուրքիայի պատվիրակության 9 անդամներ և մեկ պատգամավոր էլ Ալբանիայից։
