«Սա վառ ապացույց է, որ միջազգային հանրության կողմից նշաձողն իջեցնելու մասին պահանջ չի եղել». Դավիթ Գալստյան

Ֆրանսիայում ՀՀ դեսպանությունը երեկ հայտարարել էր, որ Ֆրանսիայի Սենատը 336 կողմ և 1 դեմ ձայնով ընդունել է Ադրբեջանի դեմ պատժամիջոցներ պահանջող բանաձև:

Բանաձևով կոչ է արվում՝ պատժամիջոցներ կիրառել Ադրբեջանի դեմ, այդ թվում՝ Ադրբեջանից գազի և նավթի ներմուծման էմբարգո սահմանել։ Բանաձևով նաև պահանջվում են Լեռնային Ղարաբաղի հայ բնակչության վերադարձի իրավունքի երաշխիքներ։

Կոչ է արվում նաև Ֆրանսիայի կառավարությանը հնարավոր ամեն ինչ անել, որպեսզի Ադրբեջանը հրատապ և խաղաղ կերպով միանա դիվանագիտական ուղիներով բանակցային գործընթացին՝ Հարավային Կովկասում կայուն խաղաղության հաստատմանը հասնելու համար։

Սենատի ընդունած բանաձևն Ադրբեջանի Մեջլիսը որակել է՝ որպես «հակաադրբեջանական»։ Միլլի Մեջլիսի միջազգային հարաբերությունների հանձնաժողովը հայտարարություն է ընդունել՝ կոչ անելով կառավարությանը պատժամիջոցներ կիրառել Ֆրանսիայի դեմ, ֆրանսիական բոլոր ընկերությունները դուրս բերել Ադրբեջանից։

Ֆրանսիայի Սենատի ընդունած բանաձևն ի՞նչ է տալու Արցախին ու արցախահայությանը, դրանից հետո ի՞նչ քայլեր պետք է իրականացնի հայկական կողմը, այդ թվում՝ Արցախի խորհրդարանը և առհասարակ Արցախի իշխանությունները։

Արցախի Հանրապետության ԱԺ «Արդարություն» խմբակցության ղեկավար Դավիթ Գալստյանը նախ ասաց, որ Ֆրանսիայի Սենատի քայլը միանշանակ ողջունելի է արցախահայության կողմից։

«Սա փաստում է նրա մասին, որ Արցախի հարցը փակված չէ։ Երբ մեզ կերակրում էին նրանով, թե միջազգային հանրությունը պահանջում է, որպեսզի նշաձող իջեցնենք՝ սա վառ ապացույցն է այն բանի, որ նման պահանջ չի եղել միջազգային հանրության կողմից և նշաձողը չի իջեցվել։ Սա պատասխան է՝ ուղղված ոչ միայն Նիկոլ Փաշինյանին, այլև այն գործիչներին, որոնք մտածում են, թե Արցախի հարցը փակված է»,- 168.am-ի հետ զրույցում նշեց Դավիթ Գալստյանը։

Նրա խոսքով՝ մինչ ՀՀ իշխանությունը փորձում է իսպառ մոռացության տալ Արցախի հարցը, միջազգային հարթակներում տարբեր ձևաչափերում այդ հարցին անդրադարձ է կատարվում՝ տարբեր բանաձևերի ընդունման տեսքով։

«Եթե մենք կարողանանք ճիշտ համագործակցել ու դիվանագիտություն վարել, ապա կհասնենք մեր նպատակին, այն է՝ տեր կանգնել սեփական իրավունքներին և վերադառնալ հայրենիք։

Այս ամենի համատեքստում, համոզված եմ, որ Արցախի օրվա իշխանությունները, այդ թվում՝ խորհրդարանը, այս քայլն անպատասխան չի թողնելու։ Նորից եմ կրկնում՝ Արցախի հարցը տարբեր միջազգային հարթակներում բարձրաձայնվելու է, և Ադրբեջանն, ի վերջո, կտեսնի, որ միջազգային հանրությունն Ադրբեջանի կատարած ոճրագործությունների նկատմամբ անտարբեր չէ։

Սրան զուգահեռ՝ պետք է հետևողական աշխատանքներ տանել՝ Ադրբեջանի կողմից պատմամշակութային արժեքների ոչնչացմանն ուղղված գնահատականներ տալու համար։ Հայկական իշխանությունը, ի վերջո, պետք է տեր կանգնի հայկական շահին, այլ ոչ թե միայն ու միայն հույսով ապրի, թե իր շահի համար կխոսեն այլ երկրներ»,- շեշտեց Դավիթ Գալստյանը։

Միաժամանակ նա ընդգծեց, որ եթե հայկական կողմն ադեկվատ քայլեր չձեռնարկի, ապա միջազգային հանրությունը կհիասթափվի հայկական կողմի այդ վարքագծից, և Արցախի հարցի լուծումն ավելի կերկարաձգվի։

«Պետք է ունենալ այն ձևաչափը, որը միակ լեգիտիմ ձևաչափն է՝ ԵԱՀԿ Մինսկի խմբի ձևաչափը։ Այն ունի միջազգային մանդատ՝ զբաղվելու Արցախի խնդրով։ Ամեն ինչ պետք է անել, որպեսզի վերականգնվի այդ ձևաչափը, որում կարող է լիիրավ մասնակցություն ունենալ Արցախը, որպեսզի կարողանանք Արցախ վերադառնալու մեր լիիրավ հույսերը գործնականում ապահովել»,- եզրափակեց Դավիթ Գալստյանը։

Նշենք, որ ավելի վաղ Ֆրանսիայի Սենատի կայքում բանաձևի վերաբերյալ նշված էր, որ Ֆրանսիայի Սենատն ամենավճռական կերպով դատապարտում է 2023 թվականի սեպտեմբերի 19-ին և 20-ին Ադրբեջանի կողմից իր դաշնակիցների աջակցությամբ Լեռնային Ղարաբաղում իրականացված ռազմական հարձակումը, որը հանգեցրեց այնտեղ բնակվող գրեթե ողջ հայ բնակչության վտարմանը։

Սենատը հիշեցնում է, որ ժողովուրդների ինքնորոշման իրավունքի հարգումը, որը տարածվում է Լեռնային Ղարաբաղի հայ բնակչության վրա, Ադրբեջանի և Հայաստանի միջև կայուն խաղաղության միակ հնարավոր ճանապարհն է, և, որ պետությունները պարտավոր են հարգել և պաշտպանել այդ իրավունքը։ Հետևաբար, միջազգային հանրությունը պարտավոր է Ադրբեջանից պահանջել գործադրել բոլոր ջանքերը՝ ապահովելու հայ բնակչության Լեռնային Ղարաբաղ վերադառնալու իրավունքը՝ նրանց անվտանգությունն ու բարեկեցությունն ապահովող պայմաններով։