ԵՄ պահեստներում պահվող սուրճը և կակաոն ոչնչացման վտանգի տակ են՝ նոր օրենքի պատճառով

Եվրամիության պահեստներում պահվող հարյուր հազարավոր տոննա սուրճը և կակաոն կարող են ոչնչացվել հունիսին ուժի մեջ մտած ԵՄ օրենքի համաձայն, որն արգելում է անտառահատվող շրջաններում աճեցված ապրանքների վաճառքը ԵՄ-ի ներսում: Այս մասին հայտնում է Financial Times (FT) պարբերականը։

Օրենքն արգելում է անտառահատվող հատվածներում աճեցված ոչ միայն սուրճի և կակաոյի, այլև արմավենու յուղի և ռետինի վաճառքը ԵՄ-ի սահմաններում։

Intercontinental Exchange-ը, որը սուրճի և կակաոյի ֆյուչերսների հիմնական առևտրային հարթակներից մեկն է, ինչպես նաև Միջազգային առևտրի կենտրոնը նախազգուշացրել են, որ անցումային ժամանակաշրջանում (մինչև 2024 թ․ դեկտեմբերը) անտառահատվող հատվածներում արտադրված և ԵՄ-ում պահվող սուրճը և կակաոն պետք է վաճառվեն ԵՄ-ի տարածքից դուրս կամ պետք է ոչնչացվեն։

Intercontinental Exchange-ը մտավախություն ունի, որ պահեստավորված ապրանքների հետ կապված խառնաշփոթը «բացասաբար կազդի ապրանքների անխոչընդոտ առևտրի և ռիսկերի պատասխանատու և արդյունավետ կառավարման վրա»: Փորձագետներն ասում են, որ դա կարող է հանգեցնել խափանումների, որոնք կազդեն «մատակարարման ողջ շղթայի վրա՝ ֆերմերից մինչև սպառող»:

Եվրոպայի պահեստներում կա մոտ 200 հազար տոննա կակաո և 150 հազար տոննա սուրճ։

FT-ի տվյալներով՝ կակաոյի մոտ 70%-ը գալիս է Կոտ դ’Իվուարից և Գանայից, որտեղ շատ տարածված են անտառահատումները և երեխայի աշխատանքը։ Սուրճի խոշորագույն արտադրողներն են Բրազիլիան, Վիետնամը, Կոլումբիան և Ինդոնեզիան:

Կանոնակարգը պահանջում է, որ ներմուծողները տրամադրեն իրենց ապրանքների տեղորոշումը, որպեսզի ապացուցեն, որ դրանք չեն ծագում անտառահատումից տուժած շրջաններից։

Եվրոպական կակաոյի ասոցիացիայի բարձրաստիճան պաշտոնյաներից մեկը հայտարարել է, որ եթե Եվրահանձնաժողովը և անդամ երկրները շուտով չհստակեցնեն անցումային ժամանակաշրջանի ընթացքում արտադրված կակաոյի հատիկների կարգավիճակը, ապա «կա մեծ հնարավորություն, որ դա կազդի կակաո աճեցնողների, ԵՄ սպառողների և ոլորտի վրա»։