ԵԱՏՄ-ում ապրանքների ներմուծման և արտահանման թույլտվություններ այսուհետ կարելի է ստանալ նաև էլեկտրոնային եղանակով
Եվրասիական տնտեսական հանձնաժողովի (ԵԱՏՀ) խորհուրդը հաստատել է ապրանքների արտահանման և ներմուծման համար լիցենզիաների և թույլտվությունների տրամադրման կանոնների նոր խմբագրությունը, որը ներառում է լիցենզիաների և թույլտվությունների տրման հնարավորություն էլեկտրոնային եղանակով, եթե դա նախատեսված է ազգային օրենսդրությամբ։ Այս մասին տեղեկանում ենք ՏԱՍՍ գործակալությունից։
«Եվրասիական տնտեսական հանձնաժողովի խորհուրդը հաստատել է այն ապրանքների արտահանման և ներմուծման համար լիցենզիաների և թույլտվությունների տրամադրման կանոնների նոր խմբագրությունը, որոնց նկատմամբ կիրառվում են երրորդ երկրների հետ առևտրում ոչ սակագնային կարգավորման միջոցներ», – ասված է հաղորդագրության մեջ։
Փաստաթղթի որոշ նորմեր կկիրառվեն՝ հաշվի առնելով այն, թե որքանով է անդամ երկիրը պատրաստ դրան՝ համաձայն ազգային օրենսդրության։
Նոր կանոնների ընդունման որոշումն ուժի մեջ է մտնում Եվրասիական տնտեսական միության պայմանագրում համապատասխան փոփոխություններ կատարելուց 60 օրացուցային օր հետո։
«Թվայնացման սրընթաց զարգացումը թելադրում է նման որոշումների կայացման անհրաժեշտությունը, որոնք, անկասկած, կպարզեցնեն բյուրոկրատական ընթացակարգերը, ինչպես նաև դրական ազդեցություն կունենան ԵԱՏՄ-ում գործարարություն վարելու պայմանների վրա», – ասել է ԵԱՏՀ առևտրի նախարար Անդրեյ Սլեպնյովը:
