Ուկրաինայի ՊՆ-ում հայտնել են առաջնագծում իրադրության մասին․ 37 բնակավայրի բնակիչներ տարհանվել են
Ուկրաինայի պաշտպանության փոխնախարար Աննա Մալյարը հայտնել է, որ ուկրաինացի զինվորականները հետ են մղում ռուսական բանակի գրոհները Կուպյանսկի, Լիմանի և Բախմուտի շրջանում, իսկ Ուկրաինայի զինված ուժերն առաջ են շարժվում Դոնեցկի և Զապորոժիեի մարզերի սահմանի մոտ։ Ռազմաճակատում տիրող իրավիճակին Մալյարն անդրադարձել է իր Telegram ալիքում։
«Իրավիճակն արևելքում բարդ է, բայց թշնամուն չի հաջողվում հասնել իր նպատակներին»,- գրում է Մալյարը՝ հավաստիացնելով, որ «պաշտպանության ուժերն արդյունավետորեն զսպում են ռուսական զորքերի առաջխաղացումը Կուպյանսկի և Լիմանի ուղղություններով»։
Մալյարի խոսքով՝ Բախմուտի հարավային թևում Ուկրաինայի զինված ուժերը շարունակում են առաջխաղացումը, սակայն Կլեշչեևկա գյուղի տարածքում «թշնամու զորքերն անհաջող փորձեր են կատարել՝ վերականգնելու իրենց կորցրած դիրքերը ծայրամասերում»․ այնտեղ ծանր մարտերը շարունակվում են։
Իսկ BBC-ի ռուսական ծառայությունը հայտնում է, որ վերջին ամիսների ընթացքում Ուկրաինայի զինված ուժերը փորձում են շրջապատել Բախմուտը և պայքարում են քաղաքի ծայրամասում գտնվող Կլեշչեևկա և Բերխովկա բնակավայրերի համար։ Դրանց նկատմամբ վերահսկողությունը ուկրաինացի զինվորականներին թույլ կտար մոտենալ Բախմուտի մատակարարման մի քանի ուղիներին:
Ինչպես հայտնել է Ուկրաինայի պաշտպանության փոխնախարարը, զինված ուժերի գրոհը Մելիտոպոլի և Բերդյանսկի ուղղություններով շարունակվում է։
Թեժ մարտեր են ընթանում նաև Ուրոժայնոյե բնակավայրի շրջանում, որը գտնվում է վերջերս կրկին Ուկրաինայի վերահսկողության տակ անցած Ստարոմայորսկոյե գյուղի հարևանությամբ, Դոնեցկի և Զապորոժիեի մարզերի սահմանից ոչ հեռու։
Ըստ Մալյարի՝ «չնայած գերծանր մարտական պայմաններին», Ուկրաինայի զորքերն Ուրոժայնոյեի ուղղությամբ «մասնակի հաջողություններ են գրանցել»։
Իր հերթին BBC-ն նշում է, որ օգոստոսի 10-ին Խարկովի մարզի իշխանությունները պարտադիր տարհանում են սկսել Կուպյանսկի շրջանի 37 բնակավայրերից, քանի որ այդ հատվածներում մշտական հրետակոծություններ են։ Մինչ այդ Ուկրաինայի զինված ուժերի ցամաքային զորքերի հրամանատար Ալեքսանդր Սիրսկին հայտնել էր Կուպյանսկի ուղղությամբ ստեղծված բարդ իրավիճակի մասին, որտեղ, նրա ունեցած տվյալներով, կենտրոնացած է մոտ 100 հազար ռուս զինվորական։
