«Որևէ մեկը որևէ զինվորից լսե՞լ է, որ 44-օրյա պատերազմի ժամանակ զենքի պակաս է եղել, բացառված է». Նիկոլ Փաշինյան
ԱԺ-ում կառավարության հետ հարցուպատասխանի ժամանակ իշխանական պատգամավոր Վահագն Ալեքսանյանը Նիկոլ Փաշինյանին խնդրեց անդրադառնալ ՀՀ երրորդ նախագահ Սերժ Սարգսյանի՝ 44-օրյա պատերազմում չօգտագործված զինատեսակների վերաբերյալ հայտարարություններին:
Նիկոլ Փաշինյանն անդրադառնալով Սերժ Սարգսյանի հայտարարություններին՝ նշեց. «Նա ասել էր, որ իրենց իշխանության ժամանակ բանակը բոլորովին ուրիշ պատրաստակամության վիճակի էր, բայց կարծում եմ՝ դրա պատասխանը հենց նույն հարցադրման հեղինակն է տվել: Եթե հիշում եք՝ 44-օրյա պատերազմի ընթացքում կամ դրա ավարտից հետո ԼՂ մի բարձրաստիճան պաշտոնյա պատմել էր, թե ինչպես 2016-17թթ. Սերժ Սարգսյանը մի հավաքի ժամանակ ասել էր, որ եթե մենք չգնանք ինչ-որ անհամափաչ կամ չգիտեմ, այդ մասը չէ էական, զիջումների, «Ղարս-Ղարս» երգը հիշում եք, «Ստեփանակերտ-Ստեփանակերտ» երգն ենք երգելու: Այդ երկու, ընդ որում՝ քաղաքական մերձավորների խոսակցություն է՝ հենց իրենց կողմից արտահայտված: Բա եթե այդքան ուժեղ և մարտունակ էր այդ ժամանակ բանակը, ինչի՞ էին երգելու «Ստեփանակերտ-Ստեփանակերտ» երգը, որովհետև մարտունակ բանակի պայմաններում պետք է ոնց որ թե ուրիշ երգ երգեինք, ես չեմ ուզում այդ երգի վերնագիրը բարձրաձայնել: Խոսվում է 2016թ. քառօրյա պատերազմի վերաբերյալ, թե ինչպես հաղթեցինք այդ պատերազմում. Ես դրան էլի եմ անդրադարձել, բայց եկեք՝ նայենք արդյունքներով:
ՀՀ դիվանագիտական խողովակներով 2016թ. հունվարին դրվել է մի փաստաթուղթ՝ ԼՂ հարցի կարգավորման, որը Հայաստանը մերժել է աշխատանքային մակարդակով: Դրանից երկու ամիս հետո սկսվել է պատերազմ, որը, ըստ այդ ժամանակվա իշխանության՝ մենք հաղթել ենք: Բայց այդ հաղթանակից հետո սեղանին է դրվել այն նույն մերժված փաստաթուղթը՝ ավելի վատ տարբերակներով: Բա եթե հաղթել ենք, ինչո՞ւ է դիվանագիտական ֆրոնտում վերահաստատվել այն տարբերակը, որ դիվանագիտական մակարդակում ՀՀ-ն մերժել էր: Կամ կներեք, էլի, մենք օդի՞ց ենք ընկել, չգիտե՞նք՝ այդ ժամանակվա բանակն ինչ էր և ինչ էր նշանակում: Սկսած նրանից, թե ծնողները ինչ էին ստիպված ուղարկել իրենց երեխեքին, սկսած նրանից, որ արձակուրդ գնալիս պետք է կոնկրետ «Գազել»-ով գնային, և այլն, և այդպես շարունակ: Այսինքն՝ օդի՞ց ենք ընկել, դա հո ասելո՞վ չի»:
Վահագն Ալեքսանյանը արձագանքեց, որ ինքն ու իր սերնդակիցները ծառայել են և այդ ամենը սեփական մաշկի վրա են զգացել. «Ապրիլյան պատերազմից հետո, երբ Սերժ Սարգսյանը, օրինակ, խոսել էր 80-ականների զենքի մասին, այսպիսի մի անեկդոտ էր պտտվում նախկին ծառայակիցներիս շրջանում, որ Սերժ Սարգսյանը դեռ Հայաստանի ապագայի բանակի մասին էր խոսում, որովհետև մենք անձամբ ծառայելով բանակում՝ 80 և ավելի բարձր թվականի զենք մեր աչքով չէինք տեսել: Դուք խոսեցիք նաև բանակցային պրոցեսից. Մենք քննիչ հանձնաժողովում ուսումնասիրում ենք բանակցային պրոցեսը, բայց բախվել ենք մի այնպիսի հարցի, որ առհասարակ ԱԳՆ-ում չի պահպանվում բանակցային նպատակներով հանդիպումների սղագրությունները՝ Սերժ Սարգսյանի, Ռոբերտ Քոչարյանի, չկա այդ ամենը, ուղղակի գոյություն չունի: Ուզում ենք հանենք-տեսնենք՝ ինչ են քննարկել այդ հանդիպումների ժամանակ, օրինակ՝ համանախագահների հանդիպում է եղել, ու չկա այդ ամենը: Այստեղից նաև մի ուրիշ հարց է ծագում, որ այդ բանակցային պրոցեսն էլ Հանրապետականի խմբակցության ղեկավարը վերջերս այդ ժառանգությունը բանակցային անվանեց երանելի ժառանգություն: Ըստ երևույթին, երանելի կամ այլ դրական բնորոշումների ընկալման հետ խնդիր կա առհասարակ այնտեղ»:
Նիկոլ Փաշինյանը շնորհակալություն հայտնեց Ալեքսանյանին՝ 80-ականների զենքի մասին հիշեցնելու համար. «Եթե ես հիշեի, կարող էի չշարունակել ուղղակի: Որևէ մեկը որևէ զինվորից լսե՞լ է, որ 44-օրյա պատերազմի ժամանակ զենքի պակաս է եղել, բացառված է, չի կարող այդպիսի բան լինել: Ընդհակառակը, որոշ վայ զինվորականներ միլիարդների զենքերով լիքը պահեստները թողել են ու փախել են: Լավ, դե հերիք է, ամեն ինչին չափ կա, սահման կա: Ինչի, չե՞նք տեսել այդ կադրերը, երբ ադրբեջանցիք իրենց գրաված զորամասի վիդեոներն են հրապարակում՝ պահեստները լիքը զենք: Իսկ 2016թ. չենք հիշո՞ւմ՝ ինչ խոսակցությունների մասին էր գնում, երբ նույնիսկ երկրի վարչապետը այդ ամբիոնից ասել է, որ դիզվառելիքի կամ չգիտեմ՝ ինչ խնդիր է եղել, հետո հասկացան՝ ինչ են արել, հերքեցին, ծածկադմփոց արեցին և այլն: Այսօր, երբ այս ամենի արձագանքը տեսնում ենք, կներեք՝ մենք ընդդիմադիր չենք եղե՞լ, պատերազմի և էսկալացիայի ընթացքում մենք ընդդիմադիր չենք եղե՞լ:
Որևէ մեկը կարո՞ղ է հանել մեր քաղաքական թիմի ներկայացուցիչների որևէ քննադատական խոսք՝ պատերազմի ժամանակ իշխանության հասցեին: Մենք ընդդիմադիր եղել ենք, բայց մենք 5-րդ շարասյուն չենք եղել: Մենք օտար երկրներից կառավարվող քաղաքական ուժ չենք եղել: Այդ, որ մեզ ինչ անուն ուզում էին կպցնեին՝ պողոսական, սորոսական, չգիտեմ՝ ինչ, այդ ինչի՞, որովհետև իրենց քաղաքական գործունեության այլ ձև հայտնի չէ, որովհետև իրենք ինչ արել են՝ ո՛չ սեփական գաղափար են ունեցել, ո՛չ սեփական տեսլական են ունեցել, ո՛չ սեփական իդեա են ունեցել, իրենց հանձնարարվել է, իրենք այդ հանձնարարության շրջանակներում էլ գործել են: Իրենք այլ ձև չեն պատկերացնում: Երկու բան՝ մեկ կառավարվել դրսից, մեկ էլ դրսում ինչքան հնարավոր բան կա՝ արագ սեփականաշնորհել, տանել կազինոներում պարտվել, կամ չգիտեմ՝ ինչ անել, ապօրինի գույք դարձնել: Զարմանալի չէ, ոչ մի զարմանալի բան չկա: Ավելին ասեմ՝ ես այսօր ուրիշ եզրակացության էլ եմ գալիս՝ մեր ամբողջ սպայական դասը իրենք կոտրել էին, և բարոյապես են կոտրել առաջին հերթին՝ որոշ ձեզ հայտնի գեներալների հրամանատարության ներքո և նրանց աշխատանքային սխեմաների ներքո աշխատեցնելով: Եվ այսօր մենք դրա հետևանքները կրում ենք: Ես հույս ունեմ՝ մենք քննիչ հանձնաժողովում մանրամասն կխոսենք ձեր բարձրացրած բոլոր հարցերի մասին: Ամեն ինչին չափ կա, սահման կա, չէ՞»:
