Տղաները նվիրված խաղացին, ես գոհ եմ խաղից. Ալեքսանդր Պետրակով
Հայաստանի ֆուտբոլի ազգային թիմի գլխավոր մարզիչ Ալեքսանդր Պետրակովի կարծիքով` հավաքականի ֆուտբոլիստները նվիրված են գործել Թուրքիայի դեմ խաղում:
«Լավ խաղ ստացվեց: Տղաները խաղացին ինքնանվիրումով: Տակտիկական խաղում սխալներ կային: Ես գոհ եմ խաղից: Կքնեմ, կարթնանամ, նորից կվերանայեմ խաղը և կասեմ, թե ինչպիսինն էր հանդիպումը»,- լրագրողների հետ զրույցում ասաց Պետրակովը:
Անդրադառնալով Հայաստանի հավաքականում նորամուտը տոնած ֆուտբոլիստներին` Տիկնիզյանին, Հարությունյանին և Իվույին, մարզիչը շեշտեց, որ գոհ է նրանց կատարած աշխատանքից:
«Երկրպագուներն էլ, իսկապես, հրաշալի մթնոլորտ ստեղծեցին: Երկրպագուներից ներողություն եմ խնդրում այս պարտության համար»,-ասաց նա:
Եվրոպայի առաջնության ընտրական փուլի մեկնարկային խաղում Հայաստանի ֆուտբոլի ազգային թիմը Երևանում ընդունեց Թուրքիայի ընտրանուն և զիջեց 1:2 հաշվով:
Մարտի 28-ին Հայաստանի ֆուտբոլի ընտրանին ընկերական խաղ կանցկացնի Կիպրոսի ֆուտբոլի հավաքականի հետ: Հանդիպումը կկայանա Վազգեն Սարգսյանի անվան Հանրապետական մարզադաշտում և կմեկնարկի 19:00-ին:
