«Առավոտյան ժամը 08։00-ին թշնամին մի քանի անգամ կրակել է, շենք-շինություններ են վնասվել, բայց այս պահին իրավիճակը նորմալ է». Վերին Շորժայի գյուղապետ
ՊՆ մամուլի քարտուղար Արամ Թորոսյանի հաղորդմամբ՝ ժամը 11:00-ի դրությամբ հայ-ադրբեջանական սահմանին էական միջադեպեր չեն արձանագրվել:
168.am-ի հետ զրույցում Գեղարքունիքի մարզի Վերին Շորժայի գյուղապետ Արտյոմ Երանոսյանն ասաց, որ իրավիճակը գիշերը հանգիստ է եղել, սակայն առավոտյան թշնամին կրակել է։
«Առավոտյան ժամը 08։00-ին թշնամին մի քանի անգամ կրակել է, բայց այս պահին իրավիճակը նորմալ է։ Շենք-շինություններ են վնասվել, բայց այս պահին ընդհանուր տվյալները ճշտված չեն։ Այս պահին չենք կարող վերջնական այդ հարցերին պատասխան տալ»,- նշեց Արտյոմ Երանոսյանը։
Ինչ վերաբերում է բնակիչների ընդհանուր տրամադրություններին, Վերին Շորժայի գյուղապետն ասաց, որ այս պահին դրա վերաբերյալ որևէ մեկնաբանություն չունի։
«Թշնամին կրակում է խաղաղ բնակավայրերի վրա, ինչպես կլինի բնակիչների տրամադրությունը»,- եզրափակեց նա։
Հիշեցնենք, որ սեպտեմբերի 13-ին, ժամը 00։05-ի սահմաններում Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ։
Այս ամենի արդյունքում, ինչպես Նիկոլ Փաշինյանը հայտարարեց ԱԺ ամբիոնից՝ հայկական կողմն ունի 105 զոհ։
