Սուշիի վնասակար և օգտակար հատկանիշները․ մանրամասնում է մասնագետը
Մանկական էնդոկրինոլոգ, սննդաբան, քաշի շտկման և սնվելու վարքագծի մասնագետ–խորհրդատու Մարիա Գերասիմովան զգուշացրել է, որ որոշ խմբի մարդկանց համար սուշին վնասակար է։ Նա
Նա նշել է, որ մինչև 7 տարեկան երեխաները, հղիները և կերակրող կանայք չպետք է սուշի ուտեն, քանի որ թյունոս ձկան մեջ սնդիկի մեծ քանակություն կա։
«Հաշվի առնելով ձկների և ծովամթերքների ջերմային մշակման բացակայությունը՝ սննդային վարակի վտանգ կա»,- Lenta.ru-ին տված հարցազրույցում ասել է Մարիա Գերասիմովան։
Իսկ ինչ վերաբերում է սուշիի հետ օգտագործվող սոյայի սոուսին, ապա մասնագետը նշել է, որ դրա չափից ավելի օգտագործումը նույնպես վտանգավոր է, քանի որ այն շատ աղի է, ուստի զարկերակային հիպերտոնիա և ճարպակալում ունեցող մարդիկ այն սննդակարգում ներառելիս պետք է հաշվի առնեն այդ հանգամանքը։
Միաժամանակ Մարիա Գերասիմովան ընդգծել է, որ սուշին և ռուլետները՝ կախված բաղադրիչներից, կարող են սննդարար նյութերի աղբյուր լինել։
«Սուշին պարունակում է, այսպես կոչված, «առողջ ճարպեր»՝ կիսաչհագեցած ճարպաթթուներ, որոնք հայտնի են նաև որպես օմեգա-3 (յուղոտ կարմիր ձուկ, ծովամթերք) և միաչհագեցած ճարպաթթուներ (ավոկադո): Ձկան կանոնավոր օգտագործումը (շաբաթական առնվազն երկու բաժին 140-ական գրամ) ապահովում է մեր օրգանիզմը բավարար քանակությամբ օմեգա-3-ով և նվազեցնում է աթերոսկլերոզի և սրտանոթային քրոնիկ հիվանդությունների, դեմենցիայի զարգացման ռիսկը»,– պարզաբանել է Մարիա Գերասիմովան՝ հավելելով, որ ձուկն ու ծովամթերքը վիտամին B12-ի հիմնական աղբյուրներից են, ինչն էլ մասնակցում է արյունաստեղծման գործընթացներին և պատասխանատու է ճանաչողական ֆունկցիաների պահպանման համար։
Բացի այդ, ձուկը, ծովամթերքը և ջրիմուռները յոդի կարևոր աղբյուր են, որն ուղղվում է վահանաձև գեղձի հորմոնների արտադրությանը՝ նյութափոխանակության և ջերմակարգավորման հիմնական կարգավորողներին:
Ձուկն ու ծովամթերքը դյուրամարս սպիտակուցի աղբյուր են, իսկ բրինձը՝ բարդ ածխաջրերի, այսինքն՝ էներգիայի հիանալի աղբյուր։
Բանջարեղենի աղցանի հետ միասին սուշին կդառնա լիարժեք հավասարակշռված կերակուր։
