Այս անգամ ի՞նչ առաքելությամբ է Զարեհ Սինանյանը մեկնել ԱՄՆ
Մի քանի օր է՝ Սփյուռքի գործերով գլխավոր հանձնակատար Զարեհ Սինանյանն ԱՄՆ-ում է: Սինանյանը ակտիվ հանդիպումների մեջ է:
Ըստ Գլխավոր հանձնակատարի գրասենյակի հրապարակումների՝ Սինանյանն արդեն հասցրել է այցելել Կալիֆոռնիա նահանգի Գլենդել քաղաքում գտնվող Հայ-ամերիկյան թանգարան և մշակութային կենտրոն՝ ծանոթանալու շինարարական և այլ ընթացիկ աշխատանքներին, հյուրընկալվել է «Wisenuts» փոդքասթի տաղավարում և «անդրադարձել հայրենադարձության ընթացիկ միտումներին, ՀՀ կառավարության ռազմավարական առաջնահերթություններին, ինչպես նաև Սփյուռքի գործերի գլխավոր հանձնակատարի գրասենյակի ծրագրերին ու նախաձեռնություններին՝ ընդգծելով Հայաստան–սփյուռք կապերի ամրապնդման կարևորությունը»։
ՀՀ սփյուռքի գործերի գլխավոր հանձնակատարը հանդիպել է նաև Գլենդելի քաղաքապետ Արա Նաջարյանի հետ, Հյուսիսային Ամերիկայի Հայ Ավետարանական միության առաջնորդների, ապա նաև՝ ԱՄՆ-ում Հայոց արևմտյան թեմի առաջնորդ Տեր Հովնան արքեպիսկոպոս Տերտերյանի հետ և այլն:
Պաշտոնական հրապարակումներից զատ՝ դեռ հայտնի չէ, թե ո՞րն է Սինանյանի ամերիկյան շրջայցի նպատակը. հիշեցնենք՝ նա միանշանակ չի ընկալվում Սփյուռքի տարատեսակ շրջանակներում և նրան հաճախ են մեղադրում Սփյուռքը պառակտելու մեջ:
