Թուրքիան սիրիացի փախստականներին Սիրիա վերադարձնելու ծրագիր է նախապատրաստում
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան ծրագիր է նախապատրաստում, որը թույլ կտա երկրում գտնվող մեկ միլիոն սիրիացի փախստականների կամավոր վերադառնալ իրենց հայրենիք: Այս մասին հայտնում է թուրքական «Անադոլու» լրատվական գործակալությունը:
Ծրագիրն իրականացվելու է թուրքական և միջազգային հասարակական կազմակերպությունների աջակցությամբ։
Իդլիբում տեղահանվածների համար թուրքական 12 հասարակական կազմակերպությունների ջանքերով կառուցված տների շահագործման հանձնման արարողության մասնակիցներին Էրդողանը հայտնել է, որ տները կառուցվել են 250 առանձին տարածքներում և կօգնեն մեղմել սիրիացիների կենսապայմանները, ովքեր տարիներ շարունակ ապրում են վրանային ճամբարներում Սիրիայի հյուսիսում գտնվող անվտանգության գոտիներում։
Էրդողանի խոսքով՝ ընդհանուր առմամբ նախատեսվում էր կառուցել 77 հազար տուն, որոնցից 57306-ի շինարարությունն արդեն ավարտված է։
Նա նշել է, որ արդեն իսկ շահագործման հանձնված տներում արդեն տեղավորվել է մինչև 50 հազար ընտանիք։
Էրդողանը վստահեցրել է, որ նման տների թիվը ապագայում կկազմի 100.000, ինչը համապատասխանաբար թույլ կտա 100.000 սիրիացի ընտանիքի բնակություն հաստատել։
