Իմ կյանքը փոխեց «Փարիզի Աստվածամոր տաճարը» մյուզիքլում Քվազիմոդոյի դերը. Գարուն՝ երևանյան մենահամերգում
Հանրահայտ երգիչ, երաժիշտ և դերասան Գարուն, որն աշխարհում ճանաչելի դարձավ Վիկտոր Հյուգոյի «Փարիզի Աստվածամոր տաճարը» ստեղծագործության համանուն մյուզիքլում Քվազիմոդոյի դերը կատարելուց հետո, ապրիլի 21-ին մենահամերգով հանդես եկավ Երևանում՝ Կ. Դեմիրճյանի անվան մարզահամերգային համալիրում:
Նա բեմ բարձրացավ Sous le vent ստեղծագործությամբ, որը միշտ երգում է աշխարհահռչակ երգչուհի Սելին Դիոնի հետ:
Իսկ իրեն նվագակցող երաժիշտներին ներկայացնելիս՝ երգիչը հարկ համարեց մեկ անգամ ևս հերքել իր հայ լինելու մասին խոսակցությունները և հիշեցրեց, որ ինքը հայ չէ ու ազգանունն էլ Գարանյան չէ, սակայն նշեց՝ սիրում է Հայաստանն ու շատ հայ ընկերներ ունի:
«Կանադայի Քվեբեկ նահանգի Շերբրուք քաղաքից եմ, նվագել սկսել եմ փոքրուց, սակայն իմ կյանքը փոխեց «Փարիզի Աստվածամոր տաճարը» մյուզիքլում Քվազիմոդոյի դերը»,- ասաց արտիստը:
Գարուն համերգի ընթացքում կատարեց ոչ միայն իր կատարմամբ սիրված երգերը, այլև Շառլ Ազնավուրի, Միշել Լեգրանի, Ջո Դասենի, Բոբ Մառլիի և այլ աստղերի գործեր:
Համերգը հնարավոր դարձավ Երևանյան հեռանկարներ միաջազգային երաժշտական փառատոնի շրջանակներում, և այս տարի այն ունի առանձնահատուկ նշանակություն, քանի որ Հայաստանը տոնում է Ֆրանկոֆոնիայի միջազգային կազմակերպությանն իր լիիրավ անդամակցության տասնամյա հոբելյանը։
