Փարիզյան կինոթատրոնը սպառնալիքներ է ստացել ռուսական ֆիլմերի ցուցադրության պատճառով
Փարիզի «Բալզակ» կինոթատրոնը սպառնալիքների պատճառով չեղարկել է ռուսական ֆիլմերի ցուցադրությունները։ Այս մասին ՏԱՍՍ-ին հայտնել է Rivage Russie Evenements ասոցիացիայի նախագահ Ժան Ռադվանին։
«Բալզակ կինոթատրոնում սպառնալիքներ են ստացվել, գիշերը անհայտ անձինք շենքի պատուհանին մահացածների գլուխներով թռուցիկներ են փակցրել, չեմ կարող ասել, թե այնտեղ ինչ է գրված։ Բացի այդ, սոցցանցերում հայտարարություններ են հնչել՝ կապված ռուսական ֆիլմերի ցուցադրության հետ, այս ֆոնին կինոթատրոնի ղեկավարությունը որոշում է կայացրել չեղարկել բոլոր ցուցադրությունները»,- ասաց նա։
Աղբյուրի հաղորդմամբ՝ դեպքի առնչությամբ ոստիկանություն բողոք չի ներկայացվել։
«Բողոք ներկայացնելու պատճառ չկա: Ինչպես գիտեք, այժմ Ուկրաինայում բարդ ժամանակաշրջան է: Եվ կան ուկրաինացիներ և նրանց կողմնակիցները, ովքեր փորձում են ճնշում գործադրել»,- բացատրեց նա:
Դիտարկմանը՝ համաձա՞յն է արդյոք ճնշման նման մեթոդներին, Ռադվանին բացասաբար է պատասխանել՝ նշելով, որ ինքը և ողջ ասոցիացիան «վրդովված են Ուկրաինայում ընթացող մարտերից և խաղաղ բնակչության մահերից»։
«Սակայն մենք կարծում ենք, որ ռուսական ֆիլմերը պետք է շարունակեն ցուցադրվել: Մենք զբաղվում ենք կինոյով և ընդհանրապես կարծում ենք, որ ռուսական մշակույթը ոչ միայն ներկայիս իշխանություններն են, այլ նաև բազմաթիվ ռուս ստեղծագործողներ»,- պարզաբանել է ասոցիացիայի ղեկավարը։
