Այս տարի Նոյեմբերյանում կրթական ու մշակութային բացառիկ միջոցառումներով կնշվի Վարդավառը
Ավանդական խաղեր, լարախաղաց, ջրոցի, հանրահայտ խմբերի և արտիստների մասնակցությամբ համերգներ, ազգային պարեր. այս և այլ նախաձեռնություններով հուլիսի 16-17-ին Տավուշի մարզի Նոյեմբերյանի տարածաշրջանում նախատեսվում է նշել Վարդավառի տոնը:
Այդ օրերին տարածաշրջանը կվերափոխվի կրթամշակութային կենտրոնի՝ ներգրավելով ոչ միայն տեղի բնակչությանն, այլև բազմաթիվ հյուրերի՝ ամբողջ Հայաստանից և արտերկրից։
Տոնակատարությունը կազմակերպում է «Կողբ» հիմնադրամը՝ համագործակցելով «Նոյեմբերյան» և «Բերդավան» հիմնադրամների հետ։
«Մեր նպատակը տարածաշրջանի մշակութային և տնտեսական զարգացմանն աջակցելն է. Վարդավառի տոնն ենք ընտրել, քանի որ տարածաշրջանում այն, թերևս, ամենասիրվածն է»,-նշել է «Կողբ» հիմնադրամի տնօրեն Մարիա Պետրոսյանը:
Նա տեղեկացրել է, որ շուտով կհրապարակեն բոլոր այն խմբերի ու արտիստների անունները, ովքեր կմասնակցեն տոնակատարությանը։
