«Խոսակցությունները, թե՝ հնդկաձավար և այլ հատիկեղեն գնեք, թանկանալու է, այդ մտածելակերպը, կարելի է ասել, պապական է». Կարեն Չիլինգարյան
Թուրքիայում առաջիկայում սպասվում է առաջին անհրաժեշտության ապրանքների համար հավելյալ գնաճ։
Բուրսայի սննդի արդյունաբերողների միության (BUYSAD) նախագահը նշել է, որ Ռուսաստանի կողմից Դոնբասում իրականացվող ռազմագործողության պատճառով ցորենի մատակարարման պակասը կբարձրացնի ալյուրի և հացի գները Թուրքիայում, իսկ արևածաղկի սերմի ներմուծման խափանումը կազդի ձեթի գների վրա:
Թուրքիայում պարենային ապրանքների գնաճն այս տարվա հունվարի 1-ից ի վեր աճել է 18 տոկոսով։
Հայաստանում ևս ռուս-ադրբեջանական պատերազմով պայմանավորված՝ լուրեր են շրջանառվում այս երկու երկրներից Հայաստան ներկրվող ապրանքների հնարավոր թանկացման մասին, սակայն «Սպառողների խորհրդատվական կենտրոն» ՀԿ-ի նախագահ Կարեն Չիլինգարյանի կարծիքով՝ գուցե ներկրման առումով ժամանակավոր որոշ բարդություններ լինեն, սակայն հարցը կլուծվի:
«Ուկրաինայից ներկրում ենք ավելի շատ քաղցրավենիք, սառեցրած հավի միս, ձեթ և այլ մթերքներ, իսկ Ռուսաստանից ավելի շատ ապրանք ենք ներկրում: Պետք է հաշվի առնել նաև այն հանգամանքը, որ ԵԱՏՄ անդամ ենք: Իսկ այն խոսակցությունները, որ ժողովուրդը տարածում է, թե՝ հնդկաձավար և այլ հատիկեղեն գնեք, թանկանալու է, այդ մտածելակերպը, կարելի է ասել, պապական է:
Հենց մի բան է լինում, «զապասով» են ամեն ինչ անում: Կորոնավիրուսի ժամանակ տեսանք, թե, օրինակ, ԱՄՆ-ում ինչ էր կատարվում, անգամ զուգարանի թուղթն էր դեֆիցիտ, հետո հասկացան, որ պետք չէր 2-3-ի փոխարեն՝ 100 հատ գնել, որ մյուսներին չմնա ու դեֆիցիտ լինի: Հուսով եմ՝ այս պատերազմը երկար չի տևի, որովհետև Ռուսաստանն էլ երկար չի կարող դիմանալ պատժամիջոցների պարագայում: Ամեն դեպքում այս ընթացքում արտառոց թանկացումներ չեն եղել»,- նշեց նա:
Ռուս-ուկրաինական պատերազմի հետևանքով առաջացած գնաճի մասին կառավարության նիստից հետո խոսել է նաև Էկոնոմիկայի նախարար Վահան Քերոբյանը՝ ասելով.
«Ամեն ինչ պետք է անենք, որ ինֆլյացիան բարձր չլինի, որովհետև դա վերաբերում է Հայաստանում ապրող յուրաքանչյուր մարդուն։ Բնականաբար, մենք ուզում ենք, որ ինֆլյացիան լինի այն միջակայքում, որը նշված է բյուջեի մասին օրենքում։ Թե ինչպես կծավալվեն դեպքերը, կախված է շատ անորոշություններից։ Մենք տեսնում ենք, որ կա էական գնաճ ցորենի շուկայում, մեծ ռիսկ կա շաքարավազի շուկայում։ Մենք մանրամասն ուսումնասիրում ենք ամեն մի ապրանքատեսակը։ Մեր գործողություններն ուղղված են լինելու գնաճի զսպմանը»։