«Նախկին բարձրաստիճան զինվորականը երբեք իրեն այդպիսի հայտարարություններ անելու իրավունք չպետք է վերապահեր». Ջհանգիրյանը՝ Մովսես Հակոբյանի մասին
Մի քանի օր է՝ մամուլում շրջանառվում է նախկին զինդատախազ Գագիկ Ջհանգիրյանի՝ իշխող «Իմ քայլը» խմբակցության կողմից ԲԴխ անդամի թեկնածու առաջադրվելու մասին լուրը: Այսօր լրագրողները հետ զրույցում, երբ Ջհանգիրյանին հարց ուղղվեց՝ լսելու համար վերջինիս կարծիքն այն մասին, թե արդյոք խնդիր կա՞ դատական համակարգում, Ջհանգիրյանը հիշեց դատարանների կողմից՝ իրավապահ մարմինների ներկայացրած միջնորդությունները մերժելու օրինակները:
«Այ, օրինակ, ես չեմ հասկանում, երբ որ ռազմական հեղաշրջման, զինված հեղաշրջման կոչի մեղադրանքով անձին տանում են խափանման միջոցը կալանք կիրառելու, և դատարանը էդ մարդուն բաց է թողնում: Ես անձեր չեմ ասում: Կամ՝ հսկայական զինվորական արսենալը, ռազմական, հայտնաբերում են մեկի մոտ, և էդ արսենալով ուզում են մարդ ձերբակալեն, կալանավորեն, դատարանը մերժում է: Ես այդպիսի բաներ չեմ հասկանում: Ես ոչ մի բան չեմ որակում, ասում եմ՝ էդ որոշումներն իրենց բողոքարկման ընթացակարգով կգնան վերև»,- ասաց նա:
Ջհանգիրյանի խոսքով՝ լրագրողները մոռանում են, որ ինքը 12 տարի համակարգում չի եղել, հո բոլոր դատավորներին անձամբ չի՞ ճանաչում, որ կարողանա պատասխանել հարցին, թե ճանաչո՞ւմ է վնգստացող դատավորների:
Նրա դիտարկմամբ՝ Նիկոլ Փաշինյանի ու դատավորների հանդիպումը ոչինչ չի նշանակում:
«Դատական իշխանության բնականոն գործունեությունն ապահովելու համար գործադիրը շա՜տ կարևոր լծակներ ունի, սկսած նրանց վարձատրությունից, շենքային պայմաններից, դատավորների քանակներից, ֆինանսական խնդիրներից…
Եթե իշխանությունը ճնշումներ գործադրեր, դատական համակարգը նրան հլու-հնազանդ կծառայեր»,- նշեց նա:
Լրագրողների հետ զրույցի ընթացքում Ջհանգիրյանը պարբերաբար կրկնում էր, թե քաղաքական հարցերի չի պատասխանում: Նա անգամ քաղաքական համարեց 44-օրյա պատերազմի ընթացքի ու այլ իրադարձությունների առնչությամբ Մովսես Հակոբյանի հայտարարությունները:
Հարցին, թե որպես իրավաբան՝ նախկին զինվորականի հայտարարությունը քաղաքակա՞ն է գնահատում, պատասխանեց.
«Նախկին բարձրաստիճան զինվորականը երբեք իրեն այդպիսի հայտարարություններ անելու իրավունք չպետք է վերապահեր»:
Ճեպազրույցի ընթացքում նաև անդրադարձ կատարվեց իրավապաշտպանների մտահոգություններին՝ Ջհանգիրյանի զինդատախազ աշխատած տարիների, Մատաղիսի գործի վերաբերյալ, որի արդյունքում շատերն այսօր նշում են, թե չի կարող ԲԴԽ օբյեկտիվ անդամ լինել, ԲԴԽ անդամի թեկնածուն փոքր-ինչ վրդովվեց:
«Ո՞ր, ո՞ր հանցագործությունն է կոծկվել՝ իմ դատախազ եղած ժամանակ: Բա հիմա 2 տարի քննչական դեպարտամենտում էդ գործը քննվում է, բա ինչո՞ւ չեն բացահայտում իրական հանցագործներին, եթե դրանք կան, և ինչո՞ւ ինձ մեղադրանք չեն առաջադրում և չեն առաջադրել նաև նախորդ իշխանությունները, որ ես էդտեղ հանցագործություն եմ կատարել»,- ասաց Գագիկ Ջհանգիրյանը:
Լրագրողների դիտարկմանը, թե դա պայմանավորված է նրանով, որ նախորդ իշխանության օրոք Ջհանգիրյանը նախորդներին էր լոյալ, այսօր՝ ներկաներին, արձագանքեց.
«Բայց չէ՞ որ 2008 թ․ ինձ մեղադրել էին հրելու համար: Բա թող գտնեին մի լուրջ մեղադրանք, մի պաշտոնեական դիրքի չարաշահում, երիտասարդ, մի չգիտեմ ինչ, Ձեր ասած սպանությունների կոծկում, և ինձ լուրջ մեղադրանքով դատեին երկարաժամկետ ազատազրկման»:
Հարցին, թե ինչո՞ւ չբողոքարկեց, երբ Մատաղիսի գործով մեղադրյալներն ազատ արձակվեցին, Ջհանգիրյանը պատասխանեց զինդատախազի պաշտոնում իրեն հաջորդած պաշտոնյաներին հիշելով:
«Մատաղիսի գործով, երբ նրանք՝ այդ դատապարտյալները, ազատվել են կալանքից և բաց են թողնվել, ես արդեն պաշտոնավարել եմ գլխավոր դատախազությունում, սիրելիներս, և զինվորական դատախազը եղել է Արմեն Խաչատրյանը: Լրացուցիչ նախաքննության արդյունքներով նոր զինվորական դատախազը նույն մեղադրյալներին, ամբաստանյալներին, դատապարտյալներին, նույն մեղադրանքներով հաստատել է մեղադրական եզրակացությունը նույն հոդվածներով և ուղարկել դատարան: Դատարանում գործը քննելիս զինվորական դատախազ է եղել արդեն Կոստանյան Գևորգը և Կոստանյան Գևորգը ինքը իր մեղադրողներով էդ գործը տարել է մինչև վերջ: Ինչո՞ւ չեք շոշափում, ասենք, Խաչատրյան, Կոստանյան և այլ անունները, չէ՞ որ երկու դատախազներ արել են այն նույնը, ինչ արել է Ջհանգիրյանը»,- նշեց Ջհանգիրյանը:
Վերջինս կրկին ասաց, թե իր պնդմամբ՝ Մատաղիսի գործով մեղավոր էին հենց դատապարտված, ապա ազատ արձակված տղաները:
