Բանակի հետ, բանակի կողքին. Վարդենիսի դպրոցի նախաձեռնությունը

Ամուր թիկունքը ուժեղ բանակի գրավականն է։ Հայրենիքի համար օրհասական այս օրերին, անկախ տարիքից և մասնագիտությունից, բոլորը իրենց հնարավորությունները ներդնում են մեր բանակին հնարավորին չափ օգնելու համար։

Ահա այդպիսի մի նախաձեռնությամբ է աչքի ընկել Արագածոտնի մարզի Վարդենիս գյուղի Զալիբեկ Հակոբյանի անվան միջնակարգ դպրոցի ուսուցչական և աշակերտական կոլեկտիվը։

Վերջիններս դպրոցի նորակառույց սպորտ-դահլիճում նախաձեռնել են քողարկող ցանցերի պատրաստման աշխատանքներ։ Վաղ առավոտից բոլորը մեկ մարդու նման թողել են ամեն տեսակ գործ ու հոգս, հավաքվել դպրոցում և փորձում են հնարավորինս արագ պատրաստել քողարկող ցանցերը։ Անմասն չեն մնացել նաև աշակերտները, որոնք իմանալով ուսուցիչների նախաձեռնության մասին վայրկյան իսկ չեն կորցրել, եկել և փորձում են իրենց հնարավորությունների սահմաններում օգտակար լինել։ Քանզի բոլորս էլ լավ ենք գիտակցում այս օրերին մեկ բռունցք դառնալու և հայոց բանակի ու հայ զինվորի կողքին լինելու կարևորությունը։