Իմ սիրտը Հայաստանի հետ է. Ուկրաինայի վերաինտեգրման հարցերով փոխնախարար
Ուկրաինայի վերաինտեգրման հարցերով նախարարի տեղակալ Դավիթ Մակարյանն իր աջակցությունն է հայտնել հայ ժողովրդին: Այս մասին տեղեկացնում էAnalitikaUA.net-ը:
«Իմ սիրտը Հայաստանի, Լեռնային Ղարաբաղում մարտական գործողությունների հետևանքով տուժած մարդկանց հետ է: Իմ հասարակական գործունեության մեջ է մտնում «Ուկրաինայի հայերի միության» ղեկավարի տեղակալի լիազորությունների իրականացումը: «Ուկրաինայի հայերի միություն»-ը մի շարք կարևոր նախագծեր է իրականացնում ինչպես Ուկրաինայում, այնպես էլ Հայաստանում տարբեր ուղղություններով՝ մշակույթ, կրթություն, սպորտ, պատմություն եւ այլն», – նշել է փոխնախարարը՝ նշելով, որ այսօր իր «հայ եղբայրներն ու քույրերը դժբախտության մեջ են»:
Մակարյանը տեղեկացրել է, որ կայացել է արտահերթ նիստ «Ուկրաինայի հայերի միության» նախագահ Վիլեն Շատվորյանի ղեկավարությամբ, հայկական համայնքների տարածաշրջանային ղեկավարների, տեղակալների, ինչպես նաեւ Ուկրաինայում ՀՀ արտակարգ եւ լիազոր դեսպան Տիգրան Սեյրանյանի մասնակցությամբ:
«Հանդիպման արդյունքներով որոշում է կայացվել շտաբ ստեղծել գործողությունների արդյունավետ համակարգման համար, առաջին հերթին՝ ԼՂ-ում մարտական գործողություններից տուժած հայերին աջակցելու համար: Շնորհակալ կլինենք յուրաքանչյուրին, ով կօգնի»,-ասել է նա:
Ուկրաինայի հայ համայնքն ակտիվորեն աջակցում է Հայաստանին: Ուկրաինայի հայ համայնքի կողմից այս ընթացքում բերվել է շտապօգնության ավտոմեքենաների մեծ խմբաքանակ, ինչպես նաև էլեկտրոգեներատորներ, բժշկական պարագաներ, ձմեռային հագուստ և կոնկրետ նշանակության այլ միջոցներ:
