«Աժ պատգամավորին, առավել ևս՝ փոխխոսնակին, վայել չեն նման ձևակերպումները». Դանիել Իոաննիսյան
ԱԺ փոխնախագահ, «Իմ քայլի» պատգամավոր Ալեն Սիմոնյանի կոշտ գնահատականները Սորոսի և Հայաստանում գործող «Սորոսի» հիմնադրամի մասին և դրան հաջորդած «Բաց հասարակության հիմնադրամի» նախագահ Լարիսա Մինասյանի հայտնի նամակը շարունակում են քննարկումների առարկա մնալ տարբեր շրջանակներում:
168.am-ի հետ զրույցում անդրադառնալով այս թեմային՝ իրավապաշտապան Դանիել Իոաննիսյանը նկատեց՝ Ալեն Սիմոնյանն իր հարցազրույցում պետք է ավելի «կոռեկտ արտահայտվեր»:
«ԱԺ պատգամավորին, առավել ևս՝ փոխխոսնակին, վայել չեն նման ձևակերպումները»,- նշեց նա՝ ի պատասխան մեր հարցին, թե որպես քաղհասարակության ներկայացուցիչ՝ ի՞նչ է կարծում՝ պետական պաշտոնյան, պատգամավորն այս ձևով կարո՞ղ է արտահայտվել:
Հիշեցնենք՝ «Հրապարակ» օրաթերթի հարցին, թե՝ «դուք ի՞նչ կապ ունեք «Սորոսի» հիմադրամի հետ, ասում են՝ Սորոսն է կառավարում այսօր մեր երկիրը, սորոսականներն էլ փայ ունեն ձեր իշխանության մեջ», Ալեն Սիմոնյանը պատասխանել էր․ «Ուրեմն Հայաստանի Հանրապետության իշխանությունը, որը լեգիտիմ է, որևիցե մեկը չի կարող ղեկավարել և իշխել կամ որևիցե բան թելադրել։ Էլ չեմ ասում, որ ուզում է՝ Սորոսը լինի, ուզում է՝ Սորոսի հերը լինի․․․»։
«Իսկ Սորոսի վաստակնե՞րը» դիտարկմանն ԱԺ փոխնախագահն արձագանքել էր. «Նաև Սորոսի վաստակները չեն կարող Հայաստանի Հանրապետությունը ղեկավարել։ Հայաստանի Հանրապետությունը ղեկավարում է Հայաստանի Հանրապետության ժողովուրդը, և ձևավորում է իր իշխանությունը ընտրությունների միջոցով։ Իսկ էդ Սորոսի խոսակցությունը, որ բերվել է օրակարգ, դա արհեստական բան է, որի նպատակը մեկն է՝ հնարել կամ վերցնել մի հատ ինչ-որ կիսամեռ բիձուկի անուն և փորձեն դրա շուրջ ինչ-որ հարցերի պատասխաններ գտնել։ Դա չի ստացվել ու չի ստացվելու, որովհետև հենց էդ մարդիկ հիմնականում դրսից սնուցվող են։ Կրկնեմ՝ Սորոսը, իրա հերը կամ որևիցե մեկը ո՞ւմ շունն են, որ ՀՀ-ում իշխանության վրա ազդեցություն ունենան։ Հայաստանի վրա ազդեցություն ունի միայն ՀՀ քաղաքացին»։
Այս հարցուպատասխանից հետո «Բաց հասարակության հիմնադրամի» նախագահ Լարիսա Մինասյանն օգոստոսի 14-ին նամակ է հղել ԱԺ նախագահ Արարատ Միրզոյանին` առաջարկելով Ալեն Սիմոնյանի արտահայտած մտքերը քննարկման դնել Էթիկայի հանձնաժողովում:
«Դիմում եմ Ձեզ խնդրանքով՝ նախաձեռնել ԱԺ էթիկայի հարցերով ժամանակավոր հանձնաժողովի ձևավորում և լսումներ՝ ԱԺ փոխխոսնակ Ալեն Սիմոնյանի կողմից ս․թ․ օգոստոսի 20-ին «Հրապարակ» օրաթերթին տված հարցազրույցում արված հայտարարությունների վերաբերյալ։ Ես համոզված եմ, Դուք կիսում եք այն տեսակետը, որ հարցազրույցը ոտնահարում է էթիկայի բոլոր նորմերը թե իր լեզվական և բառապաշարային դրսևորումներով, ինչպես նաև արտահայտած բովանդակությամբ։ Կարծում եմ լեգիտիմ ընտրված իշխող ուժն ունի ավելի պատվաբեր փաստարկներ իր կառավարմանը տիրապետելուն, քան Բաց հասարակության հիմնադրամների նախագահ Ջորջ Սորոսին վիրավորելը և Հիմնադրամի Հայաստանյան մասնաճյուղի գործունեությունը վարկաբեկելը։ Ես ավելի քան վստահ եմ, որ Ձեր կուսակցության՝ լեգիտիմ քաղաքական իշխանության համար, անպատվություն է նման փաստարկներով հանդես գալը, անգամ եթե/երբ հարկ եք համարում հանցավոր ռեժիմի ամենագռեհիկ ներկայացուցիչներից մեկի հետ բանավիճել»,- մասնավորապես նշել էր «Բաց հասարակության հիմնադրամի» նախագահը:
Նկատենք՝ այս նամակագրության տարածումից հետո, պատասխանելով hraparak.am-ի հարցին, թե ինչ կարծիք ունի Լարիսա Մինասյանի արձագանքի վերաբերյալ, Ալեն Սիմոնյանը պատասխանել է․ «Անտարբեր եմ»։
Հարցին էլ, թե ինքը վիրավորե՞լ է Ջորջ Սորոսին, ինչպես Մինասյանն է պնդում, թե քննադատական խոսք է հնչեցրել, Սիմոնյանը պատասխանել է․ «Եթե Ջորջ Սորոսը դրա մեջ վիրավորանք է տեսում, թող դիմի դատարան»։
Թեև Ալեն Սիմոնյանի այս ձևակերպումները Դանիել Իոաննիսյանը չի համարում վիրավորանք, այդուհանդերձ, կարծում է, որ այս հարցով էթիկայի հանձնաժողով պետք է հրավիրվի.
«Սա գլոբալ խնդիր է Էթիկայի հանձնաժողովների մասով, որովհետև Էթիկայի հանձնաժողովը պետք է գործի կամ մշտական հիմունքներով, ինչպես, օրինակ՝ գործում էր, եթե հիմա ճիշտ եմ հիշում, 2012 թվականին գումարված խորհրդարանում (այն ժամանակ էլ՝ սկզբում հենց Նիկոլ Փաշինյանն էր այդ հանձնաժողովի նախագահը)…Ամեն հարցով Էթիկայի հանձնաժողով ստեղծելը ռացիոնալ տարբերակ չէ. թող լինի Էթիկայի հանձնաժողով, որը մշտապես կգործի: Թեկուզ մի քիչ օրենսդրական խոչընդոտ կա այս փուլում մշտական հանձնաժողով հիմնելու մասով, սակայն դա կարող է ժամանակավոր հանձնաժողովի կարգավիճակ ունենալ, բայց գործել մշտապես, և ըստ այդմ՝ նաև այսպիսի դիմումները արդեն պատշաճ քննարկվեն այդ հանձնաժողովում»:
Քանի որ մեր զրուցակիցը նաև ներկայացնում է Հանրային խորհուրդը, նրանից ճշտեցինք՝ արդյո՞ք հանրային խորհրդի դիտակետում եղել են հասարակությանը հուզող այնպիսի հարցեր, ինչպիսիք են «Ամուլասարը», «Մաշտոցի պուրակը» և վերջերս՝ ԿԳՄՍ նախարարության կողմից հրապարակված դասապրոցեսը վերսկսելու ուղեցույցը, որին շատ ծնողներ դեմ են արտահայտվում, նա ասաց.
«Գիտեք, Հանրային խորհուրդն, ամեն դեպքում, ունի մասնագիտական հանձնաժողովներ, և ինձ թվում է, որ առաջարկը պետք է գա այդ հանձնաժողովներից: Ինքս քանի որ այդ հարցերում չունեմ բարձր կոմպետենտություն, չեմ կարող ասել. եթե լինի քննարկում, շրջանառվող նյութերին ես էլ կծանոթանամ՝ իմ դիրքորոշումը կարտահայտեմ, բայց ես ինքս, որ այդ հարցերից այդքան շատ գլուխ չեմ հանում, ես ինքս չեմ նախաձեռնում: Այս առումով, հարցը երևի պետք է ուղղվի կա՛մ Կրթության հանձնաժողովի նախագահին, կա՛մ Հանրային խորհրդի նախագահին, կա՛մ Հանրային խորհրդի այն անդամներին, ովքեր այս հարցերից կոմպետենտ են: Որովհետև այն հարցերը, որոնցում ես եմ կոմպետենտ, այո՛, ես այդ հարցերը Հանրային խորհրդում կտամ, օրինակ՝ հավաքների ազատությանը….»:
Դիտարկմանը, թե՝ կոնկրետ Ամուլսարի դեպքում դուք չունե՞ք կոմպետենտություն, նա արձագանքեց.
«Ես բնապահպան չեմ, մենք Հանրային խորհրդում ունենք շատ լավ Բնապահպանության հանձնաժողով, շատ ակտիվ անդամներով: Ինձ ճիշտ հասկացեք, էլի, ես չեմ կարող ամեն ինչով զբաղվել և չեմ էլ կարող Հանրային խորհրդի կոլեկտիվ դիրքորոշում արտահայտել»:
Հարցին՝ իսկ իրավապաշտպանների՞ առնչությամբ, որոնց, հիշեցնենք, բերման էին ենթարկել Ազգային ժողովի բակից և Կառավարության դիմաց ակցիա անելիս, իրավապաշտպանը պատասխանեց.
«Մենք հավաքների ազատության մասով ունեցանք քննարկում, և Հանրային խորհուրդը հստակ իր դիրքորոշումն արտահայտեց դեռևս հունիսի երկրորդ կեսին, որ, այո, հավաքների ազատությունը որոշ սահմանափակումներով պետք է վերականգնվի: Այն, ինչ որ կառավարությունն արեց երկու շաբաթ առաջ, դա մենք դեռևս առաջարկում էինք հունիսի վերջին. այս մասով մեր մոտեցումը հստակ է»:
