Շատ տրանսֆերներ և փոփոխություններ․ անցած շաբաթը՝ հայկական ֆուտբոլում

Անցած շաբաթը շատ հագեցած էր հայկական ֆուտբոլում, քանի որ շատ էին տրանսֆերները, շատերը՝ անսպասելի, և մարզչական փոփոխությունները։

Հայկական մի քանի ակումբներում փոխվեցին գլխավոր մարզիչները։

«Արարատ-Արմենիայի» գլխավոր մարզչի պաշտոնում է նշանակվել իսպանացի մասնագետ Դավիդ Կամպանյան։

Այս պաշտոնին անցնելուց առաջ մասնագետը մարզում էր «Լոռին»:

Նախորդ շաբաթ «Փյունիկը» խզեց պայմանագիրը թիմի նախկին գլխավոր մարզիչ Ռոման Բերեզովսկու հետ, իսկ արդեն այս շաբաթվա ընթացքում «Փյունիկը» պաշտոնապես հայտարարել է Արտակ Օսեյանին գլխավոր մարզչի պաշտոնում նշանակելու մասին:

Վարդան Բիչախչյանը լքել է «Շիրակի» գլխավոր մարզչի պաշտոնը:

«Շիրակն» արդեն հայտարարել է նոր գլխավոր մարզչի նշանակման մասին: Թիմը գլխավորելու է Տիգրան Դավթյանը։

«Մեր լեգենդար ավագ Տիգրան Դավթյանն այսուհետ կգլխավորի «Շիրակ» ՖԱ-ն:
Վստահ ենք, որ պ-ն Դավթյանի գլխավորությամբ մեր ավանդույթները և համբավը կշարունակեն լինել բարձունքում»,- ասված է ակումբի հայտարարության մեջ։

«Շիրակից» հեռացած Վարդան Բիչախչյանն աշխատանքի է անցել Երևանի «Արարատում», տեղեկացնում է ակումբի մամուլի ծառայությունը: Նշվում է, որ Բիչախչյանի գլխավորած շտաբում ընդգրկված են լինելու Ֆելիքս Խոջոյանը, Էդգար Թորոսյանը, ինչպես նաև դարպասապահների մարզիչ Արթուր Հովհաննիսյանը:

Տրանսֆերները շատ առատ էին այս շաբաթ և գուցե նաև սկանդալային, քանի որ Գյումրիի «Շիրակից» շատ ֆուտբոլիստներ անսպասելիորեն տեղափոխվեցին «Արարատ»։ Բոլոր տրանսֆերները՝ մեկ տողով։

«Շիրակի» կիսապաշտպան Կարեն Մուրադյանը տեղափոխվեց «Արարատ»:

Անտոն Կոբյալկոն հեռացել է «Արարատ-Արմենիայից»։ Ավելի ուշ «Փյունիկը» պաշտոնապես հայտարարել է ռուս հարձակվողի հետ պայմանագիր կնքելու մասին:

«Նոան» պայմանագիր է կնքել Հայաստանի ազգային հավաքականի 24-ամյա պաշտպան Ժոաո Ժորդի Մոնրո Արարատի հետ։

Հայաստանի հավաքականի պաշտպան Հայկ Իշխանյանն «Ալաշկերտից» վերադարձել է «Գանձասար»։

«Ուրարտուն» պայմանագիր է ստորագրել 32-ամյա պաշտպան Դմիտրի Գուզի հետ։

«Ուրարտու» է տեղափոխվել նաև 28-ամյա պաշտպան Դիոգո Մանուել Կոելյոն:

«Նոան» պայմանագիր է կնքել Մոսկվայի «Լոկոմոտիվի» սան Նիկիտա Դուբչակի հետ, ով հանդես է գալիս կիսապաշտպանությունում։

Երևանի «Փյունիկը» պայմանագիր է կնքել կիսապաշտպան Արթուր Գրիգորյանի հետ։

«Արարատ-Արմենիա» է տեղափոխվել բրազիլացի պաշտպան Գիլյերմո Անտոնիո դե Սոուզան (Ալեմաո)։

«Ուրարտուն» պայմանագիր է ստորագրել 26-ամյա հարձակվող Ալեքսանդր Ռադչենկոյի հետ։

«Արարատից» հեռացել են մի շարք ֆուտբոլիստներ, այդ թվում՝ Կոելո Վիեյրան, Վիկտոր Հուգոն, Սանտոս Դաս Նևես Խամեսը, Իգոր Գաբրիել Ագուիարը, Ռաֆայել Էնրիկեն, Պավել Ստեպանեցը, Դավիդ Դավիդյանը, Թոմաս Ֆիբելը, Դմիտրի Ռիժովը, Զուրաբի Արզիանին, Արունա Լուկմանը, Օսենի Գանիյու Բոլաջին, Վեսլեն Ժունիորը, Կոնստանին Մորոզովը և Դենիս Դեդեչկոն:

«Արարատ-Արմենիան» պաշտոնապես հայտարարել է Սարգիս Շահինյանի հետ պայմանագիր կնքելու մասին: