Քաղաքային իշխանությունները սովոր են հաշվեհարդար տեսնել այս կամ այն անձի նկատմամբ. Դավիթ Խաժակյանը՝ ապամոնտաժված գրատնակների մասին
Կարծում եմ, այս կրպակի մասին որոշումն ավելի շատ հայեցողական էր, գուցե կապված էր քաղաքապետի կամքի հետ: Այս մասին այսօր՝ հուլիսի 23-ին, 168.am-ի հետ զրույցում ասաց Երևանի ավագանու «Լույս» խմբակցության ղեկավար Դավիթ Խաժակյանը՝ անդրադառնալով մայրաքաղաքի գրատնակների ապամոնտաժմանը:
«Կարծում եմ, եղած կրպակների մեջ ամենագեղեցիկներից էր, և, վստահաբար, նախ պետք է թույլ չտալ, որպեսզի շարունակվեն վտանգավոր հատվածներում և անճոռնի կրպակների տեղադրումը, և հետո նոր միայն մտածել այսպիսի կրպակների մասին, որոնք իրենց տեսքով և նշանակությամբ էապես տարբերվում են մյուսներից»,- ասաց Խաժակյանը:
Դիտարկմանը, որ շատերն անդրադառնալով գրատնակների ապամոնտաժմանը, նշում էին, որ կարելի էր այնպես անել, որ հետագայում դրանք թեկուզ այլ տեղերում ծառայեին իրենց նպատակին, ոչ թե ամբողջությամբ ավերվեին, Խաժակյանն ասաց.
«Որքան հասկանում եմ, այս որոշումն ավելի քաղաքական էր, գուցե պայմանավորված էր ինչ-որ ներկուլիսային խնդիրներով, որովհետև քաղաքային իշխանությունները սովոր են հաշվեհարդարներ տեսնել այս կամ այն անձի նկատմամբ, իրենց ունեցած լիազորությունների շրջանակներում, և երբ հարցնում ես՝ ինչո՞ւ, մեկնաբանություն ես ցանկանում ստանալ, որևէ ռացիոնալ բան չի բերվում, միայն տեղեկացված մարդն է հասկանում, թե դա ինչին է կցված: Կարծում եմ՝ այս որոշումն այդ շարքից էր»:
Նշենք, որ Երևանում՝ Տերյան-Իսահակյան փողոցների խաչմերուկում առաջին գրատնակը բացվել էր 2017 թվականի հուլիսի 3-ին, բացմանը ներկա էին նաև Մշակույթի նախկին նախարար Արմեն Ամիրյանը, Երևանի նախկին քաղաքապետ Տարոն Մարգարյանը:
Արմեն Ամիրյանն այսօր ֆեյսբուքյան իր էջում անդրադարձել է այս թեմային՝ նշելով, որ ինքը որևէ կապ չի ունեցել ապամոնտաժված գրատնակների սեփականատեր ընկերության հետ, ինչպես նաև գրել է, որ պետությունը որևէ ներդրում չի արել դրանց տեղադրման մեջ. «Ներդրումն ամբողջությամբ կատարել է մասնավոր ընկերությունը։ Եթե չեմ սխալվում ՝մոտ 60 մլն դրամ։ Դրանք պարզապես կրպակներ չէին, դրանք յուրօրինակ հուշարձաններ էին»:
Ամիրյանը ցավ է հայտնել, որ ուշ է տեղեկացել գրատնակները քանդելու որոշման մասին՝ նշելով, որ հակառակ դեպքում անձամբ կզանգեր Վարչապետին և կխնդրեր նրա միջամտությունը։
168.am-ը կապ հաստատեց Երևանի քաղաքապետի մամուլի խոսնակ Հակոբ Կարապետյանի հետ՝ հետաքրքրվելով, թե ի՞նչ սկզբունքով են ապամոնտաժվել գրատնակները.
«Եթե չեմ սխալվում՝ 5 կրպակներ են եղել: Գրատնակները՝ կրպակները, անունն ինչ էլ դնենք, դրանք կրպակ են, որոնք տեղադրվել էին՝ առանց օրինական հիմքի: Երկրորդ՝ դրանք չէին ծառայել իրենց նպատակին, վաճառվում էին՝ հեռախոսներ, աքսեսուարներ և այլն, որևէ խոչընդոտ իրենց նախնական մտահղացման համաձայն իրագործելու՝ չի եղել, և քանի որ կա քաղաքականություն՝ քաղաքը, հատկապես՝ մայթային հատվածը և երթևեկելի հատվածները, մաքրել ավելորդ էլեմենտներից և սկսել դրանք օրինական հիմք չունեցող կրպակներից, նաև սրանք են մաքրվել: Ինչ վերաբերում է դրանց ընդհանրապես գեղարվեստական արժեքին, ապա ոչ միանշանակ է այն կարծիքը, որ դրանք քաղաքին տեսք էին տալիս կամ հարիր էին քաղաքին, ընդհակառակը՝ կա կարծիք, որ դրանք ավելի շատ խաթարում էին քաղաքի տեսքը»:
Դիտարկմանը, որ նշում եք, թե դրանք իրենց նպատակին չէին ծառայում, բայց մյուս կողմից էլ ասում եք, որ օրինական չեն եղել, ստացվում է, եթե տվյալ գրատնակները շարունակեին գիրք վաճառել, չպե՞տք է ապամոնտաժվեին, Կարապետյանը պատասխանեց. «Ես ներկայացնում եմ այն հանգամանքները, որոնք առկա են»:
Հարցին, թե նշված հատվածներում ինչ-որ բան լինելո՞ւ է, Կարապետյանը պատասխանեց. «Դա հանրային տարածք է, որը նախ խանգարում է երթևեկությանը՝ վարորդներին և հետիոտներին: Մենք ունենք ահազանգեր, որ այդ խաչմերուկներում, որտեղ տեղադրված էին կրպակները, իսկ դրանք հիմնականում դրված էին խաչմերուկներում և երթևեկությանն ուղղակի խանգարում էին: Հիմա այդ տարածքը կբարեկարգվի և կլինի ոչ թե դատարկ, այլ հանրային ազատ տարածք»:
Հարցին, թե այստեղ քաղաքական ենթատեքստեր չկա՞ն, քանի որ այդ թեման ևս շատ է քննարկվում, Կարապետյանը պատասխանեց. «Եթե այստեղ ուզում են քաղաքական ենթատեքստ տեսնել, ամենայն հարգանքով՝ պարոն Ամիրյանի անցածի և անձի նկատմամբ, ցավով պետք է նշեմ, որ պարոն Ամիրյանի գրառման մեջ նկատվում է քաղաքական ենթատեքստ, առավելևս՝ փաստերի խեղաթյուրման ուղեկցությամբ»:
Կարապետյանն անդրադարձավ Մշակույթի նախկին նախարար Արմեն Ամիրյանի գրառման այն հատվածին, որտեղ Ամիրյանը նշել էր. «Նորմալ չէ, երբ մի դեպքում՝ ծանրաբեռնված կենտրոնի փակուղի փողոցում, առանց ավտոկայանատեղի նախատեսելու, բազմաբնակարան շենքի թույլտվություն եք տալիս, մյուս կողմից՝ խոսում եք օրինականության մասին»:
«Գիտեք, որ ներկայումս բազմաբնակարան շենքերի կառուցման պայմաններից մեկը, որը դնում է քաղաքային իշխանությունը կառուցապատողների առաջ, դա 70-80 տոկոսի չափով ստորգետնյա կայանատեղիներ ունենալն է: Պարոն Ամիրյանը չի նշում, թե կոնկրետ ինչ շինության մասին է ինքը խոսում՝ ակնարկելով օրինականության դեֆիցիտի մասին, համենայնդեպս, շատ կուզեինք իմանալ նաև պարոն Ամիրյանի կարծիքը՝ հատկապես իր կառավարության ղեկավարի ունեցած դղյակների օրինականության և ընդհանրապես քաղաքում նրանց ներկայության պատեհության մասին՝ քաղաքային այգու հաշվին կառուցված, նկատի ունեմ Մոնումենտի այգին և այնտեղ բուսնած դղյակները»,– հակադարձեց Կարապետյանը:
Անդրադառնալով գրատնակների ապամոնտաժմանը՝ հետաքրքրվեցինք, թե հնարավոր չէ՞ր այնպես ապամոնտաժել, որպեսզի դրանք հետագայում թեկուզ այլ վայրերում տեղադրվեին, Կարապետյանը պատասխանեց, որ մինչև դրանց ապամոնտաժումը սեփականատիրոջը ծանուցել են ապամոնտաժման մասին, առաջարկել, որպեսզի իրենք իրենց ուժերով ապամոնտաժեն, սակայն նրանք չեն արձագանքել.
«Կրպակները գոյություն ունեն, կրպակներն ի պահ են տրված, ինչ-որ տեղ: Դրանք ունեն սեփականատեր, որը կարող է ցանկացած պահի գալ, վերցնել այդ կրպակները և տնօրինել»:
