Չարորակ ուռուցք ունեցող հիվանդներին անհրաժեշտ դեղամիջոցի առաջին անվճար խմբաքանակն արդեն բաժանված է. Ալինա Նիկողոսյան
Հերցեպտին 600-ի առաջին անվճար խմբաքանակը, որն անհրաժեշտ է չարորակ ուռուցք ունեցող հիվանդներին, արդեն ամբողջությամբ բաժանված է. 168.am-ի հետ զրույցում ասաց Առողջապահության նախարարի մամուլի խոսնակ Ալինա Նիկողոսյանը.
«Այն նախատեսված է երկու կուրսի համար: Հաջորդ խմբաքանակն արդեն ճանապարհին է, կարծում եմ՝ առաջիկայում կհասնի: Կոնկրետ ժամկետ չեմ կարող ասել՝ հաշվի առնելով ինքնաթիռների թռիչքների խնդիրները»:
Ավելի վաղ Առողջապահության նախարարության մամուլի բաժնից մեզ տեղեկացրել էին, որ դեղամիջոցը չի տրամադրվելու միայն 4-րդ ստադիայում գտնվող հիվանդներին, որոնց դեպքում այն արդեն անարդյունավետ կլինի: Այս դեղորայքը, որն արժե ավելի քան 600 հազար դրամ, անհրաժեշտ է լինում կրծքագեղձի քաղցկեղով հիվանդ կանանց 20-25 տոկոսին:
Մեր ընթերցողների խնդրանքով դեռևս անցած տարի էինք ԱՆ հարցում ուղարկել, թե ո՞ր բժշկական կենտրոններն են պետական պատվերի շրջանակներում ուռուցքաբանական ծառայություններ մատուցում: Ստորև ներկայացնում ենք նաև հաստատությունների ցանկը.
«Պրոֆ. Ռ.Օ.Յոլյանի անվան արյունաբանական կենտրոն ՓԲԸ, Մեդլայն կլինիկ ՍՊԸ, Արթմեդ բժշկական վերականգնողական կենտրոն ՓԲԸ, Սուրբ Գրիգոր Լուսավորիչ ԲԿ ՓԲԸ, Վ.Ա.Ֆանարջյանի անվան ուռուցքաբանության ազգային կենտրոն, Նաթալի ֆարմ ՍՊԸ Աստղիկ բժշկական կենտրոն, Երևանի Մխիթար Հերացու անվան պետական բժշկական համալսարան Հիմնադրամ, Վ. Ավագյանի անվան բժշկական կենտրոն ՍՊԸ, Շենգավիթ բժշկական կենտրոն ՓԲԸ, Սուրբ Աստվածամայր բժշկական կենտրոն ՓԲԸ, Նաիրի ԲԱՄ ՓԲԸ, Վանաձորի բժշկական կենտրոն, Գորիսի բժշկական կենտրոն ՓԲԸ, «Իրա մեդիքլ գրուպ» ՓԲԸ»:
Ախտորոշման ճշտում և սիմպտոմատիկ բուժում իրականացնում են նշված բոլոր հաստատություններում: Քիմիաթերապևտիկ բուժում չի իրականացվում դրանցից 3-ում՝ Վ. Ավագյանի անվան բժշկական կենտրոն ՍՊԸ, Շենգավիթ բժշկական կենտրոն ՓԲԸ, Սուրբ Աստվածամայր բժշկական կենտրոն ՓԲԸ: Գորիսի բժշկական կենտրոն ՓԲԸ-ն չի իրականացնում վիրահատական բուժում: Ճառագայթային բուժում պետպատվերի շրջանակում իրականացվում է միայն Վ.Ա.Ֆանարջյանի անվան ուռուցքաբանության ազգային կենտրոնում:
Առողջապահության նախարարի հրամանով՝ չարորակ հիվանդությունների վիրահատական և ճառագայթային բուժումներն ամբողջ բնակչության համար անվճար հիմունքներով են իրականացվում: Իսկ ովքե՞ր կկարողանան անվճար օգտվել մյուս ծառայություններից.
«Ռադիոգինեկոլոգիական (բրախիթերապիա) բուժումը սոցիալապես անապահով ու առանձին (հատուկ) խմբերում ընդգրկված անձանց համար կլինի անվճար, իսկ անապահով, բայց հատուկ խմբում չընդգրկվածների համար՝ համավճարով: Բարորակ հիվանդությունների ճառագայթային բուժումը չարորակ հիվանդությունների սիմպտոմատիկ բուժումը սոցիալապես անապահով ու առանձին (հատուկ) խմբերում ընդգրկված անձանց համար կլինի անվճար, իսկ անապահով, բայց հատուկ խմբում չընդգրկվածների համար՝ վճարովի»:
Չարորակ ուռուցքաբանական և արյունաբանական (Հոջկինի լիմֆոմա, ոչ հոջկինյան լիմֆոմա) հիվանդությունների քիմիապրեպարատների ծախսերն Առողջապահության նախարարությունը կհատուցի մասնակի. սոցիալապես անապահով ու առանձին (հատուկ) խմբերում ընդգրկված անձանց համար քիմիաթերապևտիկ 1 կուրսի համար կփոխհատուցվի 60 հազար դրամ, իսկ մեկ հիվանդի համար՝ տարեկան 300 հազար դրամ, առանձին խմբերում չընդգրկվածների համար՝ ոչ ավելի, քան քիմիաթերապևտիկ 1 կուրսի համար՝ 30.0 հազար դրամ, իսկ մեկ հիվանդի համար՝ տարեկան 150,0 հազար դրամ:
