Դուք հաջողությամբ կործանել եք Ֆուտբոլի ֆեդերացիան. Սուրեն Բաղդասարյանը՝ ՀՖՖ գլխավոր քարտուղարին և փոխնախագահին
Այսօր ՀՖՖ-ում ներկայացնում էին նախագահի և գործկոմի անդամների թեկնածուներին: Ֆեդերացիայի նախագահի պաշտոնի համար առաջադրվեցին երեքը, որոնց մեջ էր նաև ֆեդերացիայի գլխավոր քարտուղար Արմեն Մելիքբեկյանը: Ֆուտբոլային մեկնաբան Սուրեն Բաղդասարյանին սա այնքան էլ դուր չեկավ, նա մեղադրեց ՀՖՖ գլխավոր քարտուղարին և փոխնախագահին ֆեդերացիան կործանելու մեջ:
«Ըստ էության դուք եք ավելի քան 1 ու կես տարվա ընթացքում ղեկավարել ֆուտբոլի ֆեդերացիան և հաջողությամբ կործանել եք այն: Ի՞նչ բարոյական իրավունքով է Մելիքբեկյանն առաջադրել իր թեկնածությունը: Զարմանալի է, որ անցյալ տարի պարոն Մելիքբեկյանը գործկոմի անդամ է դարձել, հետևաբար՝ նաև ընտրվել է գլխավոր քարտուղար և նախագահի տեղակալ «Զվարթնոց» ֆուտբոլային ակումբի կողմից, որին այսօր Դուք «ֆեյք» եք համարում, արդյո՞ք Մելիքբեկյանը ևս ֆեյք է համարվում»:
ՀՖՖ փոխնախագահ Արմեն Նիկողոսյանը հրաժարվեց պատասխանել հարցի առաջին մասին, երկրորդին արձագանքեց հետևյալ կերպ.
««Ֆեյք»-ը Ձեր արտահայտությունն է, պարոն Բաղդասարյան, մերը չէ, Դուք մտածեք՝ ովքեր են «ֆեյք»»:
ՀՖՖ նախագահի և գործկոմի ընտրությունները կկայանան դեկտեմբերի 23-ին:
