«Բյուջեի նախագծում կան չհիմնավորված ծախսեր. սա ոչ թափանցիկ գործելաոճ է». Սերգեյ Բագրատյան
![](https://168.am/wp-content/uploads/2017/11/Sergey-Bagratyan-6.jpg)
ԱԺ «Բարգավաճ Հայաստան» խմբակցության պատգամավոր Սերգեյ Բագրատյանի խոսքով՝ 2020 թվականի պետական բյուջեի նախագծում նախատեսված են ծախսեր, որոնք հիմնավորված ու արժանահավատ չեն:
«Մասնավորապես՝ պետական բյուջեից ֆինանսավորվող «այլ ծախսեր» բաժնում 3 միլիարդ 780 միլիոն դրամ է նախատեսված, որը չի հասկացվում, թե ինչ ծախսերի համար է նախատեսված: Սա ոչ թափանցիկ գործելաոճ է: Սրանից զատ, կան նաև այլ ծախսեր, որոնք նույնպես անհասկանալի են, այդ թվում՝ դրամաշնորհների մասով»,- այս մասին մամուլի ասուլիսին ասաց Սերգեյ Բագրատյանը՝ անդրադառնալով 2020 թվականի պետական բյուջեի նախագծին:
Ինչ վերաբերում է գիտության ոլորտին, ապա, ըստ Սերգեյ Բագրատյանի, այնտեղ կա 1,5 միլիարդ թերֆինանսավորում, իսկ մշակույթի ոլորտում էլ մոռացել են մարզային մշակութային տների բարելավման մասին, ուստի այս ամենը հաշվի առնելով՝ կարելի է ասել, որ այլևս Հայաստանը գիտության պահպանության խնդիր է լուծում, իսկ նման ճանապարհով անհնար է գիտություն զարգացնել:
«Գիտությունից պահանջել պրոդուկտ, երբ նրան տրամադրում են գոյատևման գումար, պարզապես անհնարին է»,- ընդգծեց Ս. Բագրատյանը:
Զվարթ Խաչատրյան