«Գուցե այն հատվածներում, որտեղ բացարձակ ծաղկում չի եղել, հնարավոր է լողալ, բայց ճահճացած մասերում չի կարելի». Կարինե Դանիելյան

«Հանուն կայուն մարդկային զարգացման» ասոցիացիայի նախագահ Կարինե Դանիելյանի կարծիքով՝ ամեն դեպքում Սևանում չպետք է լողալ։

«Գուցե այն հատվածներում, որտեղ բացարձակ ծաղկում չի եղել, հնարավոր է լողալ, բայց ճահճացած մասերում չի կարելի»,- այսօր լրագրողների հետ հանդիպմանն ասաց Կարինե Դանիելյանը։

Ինչ վերաբերում է Սևանի քաղաքապետի և Գեղարքունիքի մարզպետի՝ Սևանում լողալուն, նա նկատեց, որ գուցե դրանով ցանկանում են ցույց տալ, որ խնդիր, «պանիկա» չկա։
«Սևանում հատվածներ կան, որ չեն ծաղկել, բայց զարմանալին այն է, որ տարածքի օբյեկտների տերերն ասում են, որ ջուրն անվտանգ է, և կարող են այն նույնիսկ խմել։ Լավ է, որ մարզպետը թույլ չտվեց, որ գնան այդ քայլին, քանի որ շատ ռիսկային էր։ Պետք է գիտակցենք, որ Սևանի խնդիրը համազգային խնդիր է։ Կարծում եմ՝ պետք է ռազմավարական քայլեր ձեռնարկվի, վաղուց էր հայտնի, թե ինչ պետք է անեն այդ խնդիրներին չհասնելու համար, բայց չեն արել։ 2010 թվականին ծրագիր էր հաստատվել, պետք է իրագործեին, բայց ոչինչ չեն արել»,- նշեց Կ. Դանիելյանը։

Նրա խոսքով՝ պետք է ստեղծվի օպերատիվ խումբ, և հասկանան, թե ինչ պետք է անել, քանի որ այն վիճակը, որում հայտնվել է լիճը, տարիների ընթացքում կուտակված բացասական ազդեցության հետևանքն է լճի վրա։

«Նախ՝ պետք է ազգովի հավաքվենք ու լիճը մաքրենք։ Երբ բարձրանում է ջրի մակարդակը, դրանից առաջ ափերը պետք է նախապատրաստեին, բայց չարեցին, ու անտառը մնաց ջրի տակ, բայց այն ժամանակ Բնապահպանության նախարարությունն ասաց, որ դա խնդիր չէ։ Մեր վերաբերմունքը Սևանի հանդեպ պարզապես բարբարոսական է եղել։ 1964 թվականից Սևանը ծաղկել է, բայց քիչ տարածություններ են եղել։ Այժմ մեծ աշխատանքներ պետք է արվեն»,- շեշտեց բնապահպանը։

Մանրամասները՝ 168.am-ի տեսանյութում