Կրեմլը չի կարծում, որ «Բուրեվեստնիկ» հրթիռի փորձարկումը կսրի Ռուսաստանի և ԱՄՆ-ի հարաբերությունները
«Բուրեվեստնիկ» հրթիռի փորձարկումը Ռուսաստանի և ԱՄՆ-ի միջև հարաբերությունների էսկալացման առիթ չպետք է դառնա, հատկապես այն պարագայում, որ այդ հարաբերություններն ամենացածր մակարդակի վրա են, հայտարարել է Կրեմլի խոսնակ Դմիտրի Պեսկովը:
Այս մասին հաղորդում է «Ինտերֆաքս» գործակալությունը: «Այստեղ չկա որևէ բան, որը կարող է կամ պետք է սրի Մոսկվայի և Վաշինգտոնի միջև հարաբերությունները, հատկապես, որ այդ հարաբերությունները գտնվում են նվազագույն մակարդակի վրա, և դեռ նոր են նշմարվում առաջին, այսպես ասած, անհամարձակ ջանքերն այդ հարաբերությունները նախկին փակուղային վիճակից դուրս բերելու համար», – ասել է Պեսկովը՝ պատասխանելով այն հարցին՝ արդյոք նոր ռուսական հրթիռի փորձարկման մասին հայտարարությունը կհանգեցնի լարվածության աճի և երկու երկրների միջև հարաբերությունների սրման։Կրեմլի խոսնակը հավելել է, որ հարաբերությունների բարելավման գործընթացը բարդանում է Մոսկվայի դեմ գործողությունների պատճառով:
«Այնուամենայնիվ, մենք, միևնույն է, առաջին հերթին մեր սեփական շահերից ելնելով, բաց ենք մնում հարաբերությունների կարգավորման համար», – ասել է Պեսկովը։
Ռուսաստանի նախագահ Վլադիմիր Պուտինը հոկտեմբերի 26-ին հանդիպում է ունեցել Ռուսաստանի զինված ուժերի գլխավոր շտաբի պետ Վալերի Գերասիմովի և ռազմական գործողություններին մասնակցող ստորաբաժանումների հրամանատարների հետ։
Հոկտեմբերի 26-ին Ռուսաստանի նախագահ Վլադիմիր Պուտինին զեկուցել են «Բուրեվեստնիկ» թևավոր հրթիռի հաջող փորձակման մասին:
«Բուրեվեստնիկը» կարող է միջուկային մարտագլխիկ կրել և, ըստ Մոսկվայի, կարող է շրջանցել պաշտպանական ցանկացած համակարգ: «Բուրեվեստնիկ»-ը երկնքում է եղել շուրջ 15 ժամ՝ անցնելով 14 000 կմ, և դա, ըստ Մոսկվայի, դրա հնարավորությունների սահմանը չէ:
