«Ինչ-որ բան ոչնչացնելուց առաջ պետք է ունենան երաշխավորված այլընտրանք». Գևորգ Պետրոսյան

Ինչ-որ բան ոչնչացնելուց առաջ պետք է ունենան երաշխավորված այլընտրանք։ Այս մասին լրագրողների հետ զրույցում ասաց ԲՀԿ խմբակցության պատգամավոր Գևորգ Պետրոսյանը՝ անդրադառնալով դատական համակարգի բարեփոխումներին, անցումային արդարադատությանը։

«Գալիս է մի եվրոպացի փորձագետ, մի բան է ասում, մի ամերիկացի գալիս՝ մի բան է ասում։ Հետո էլ՝ ամենավիրավորականը, գալիս են Ազգային ժողով, փոխանակ բարի լինեն, իրենց ճառը կարդալուց հետո լսեն հնչող տեսակետները՝ զբաղվում են իրենց հեռախոսներով։ Սա արհամարհանք է մեր պետականությանը, ԱԺ-ին, ժողովրդի իրավաչափ ակնկալիքների նկատմամբ»,- ասաց Պետրոսյանը՝ անդրադառնալով Անցումային արդարադատության ներդրման շուրջ ԱԺ հրավիրած քննարկումներին։

«Շատ-շատերի կարծիքով՝ անհրաժեշտությունը դեռ մեկ տարի առաջ կար, սակայն ես այդքան էլ այդպես չեմ կարծում, քանի որ անցումային արդարադատության համար պետք է իրապես հիմք։ Իհարկե, այն գնով, ինչով տեղի ունեցավ, չէի ուզենա, որ էդպես լիներ, բայց այսօր իրապես այլևս փոխարինող որևէ բան չկա, որ կարողանանք ունենալ դատական համակարգ, որը լինի անաչառ և մարդու իրավունքները պաշտպանի»,- անցումային արդարադատության անհրաժեշտությանն անդրադառնալով՝ նշեց ԱԺ «Իմ քայլը»  խմբակցության պատգամավոր Սոֆյա Պետրոսյանը։

Արդյոք հնարավոր չէ՞ր այն իրականացնել աստիճանական բարեփոխումների միջոցով՝ հաշվի առնելով, որ շուրջ 1 տարի է, ինչ իշխանափոխություն է եղել, և վեց ամիս է, ինչ «Իմ քայլը» խմբակցությունն օրենսդիր մարմնում մեծամասնություն է, եղե՞լ է որևէ առաջարկ, դատական համակարգը բարեփոխելու որևէ նախաձեռնություն, որը ներկայացրել եք՝ 168.am-ի հարցին ի պատասխան՝ Սոֆյա Հովսեփյանը նշեց, թե խմբակցությունում պարբերաբար քննարկումներ են եղել, և խնդիրները, որոնք որ տեսել են, այս խնդիրների շուրջ համապատասխան հանձնաժողովն աշխատել է, և որևէ առաջարկ, որպես այդպիսին դեռ չէր եղել։

Մեր մյուս հարցին, թե Հայաստանում կա՞ն արդյոք այնպիսի անաչառ մասնագետներ, ովքեր կարող են այդ անցումային արդարդատություն և վեթինգ իրականացնող մարմնում ներգրավվել, Ս. Հովսեփյանն արձագանքեց՝ կան, և հավելեց, որ հստակ գործիքակազմ պետք է մշակվի, որտեղ սուբյեկտիվ գործոնը պիտի նվազագույնի բերվի։

Պատասխանելով մեր  նկատառմանը, թե արդյոք այս բարեփոխումներն իսկապե՞ս ժողովրդի պահանջն էր, և ոչ թե՝ իշխանության ցանկությունը, ինչպես նշվում է՝ հաշվի առնելով, որ վարչապետի՝ դատարանների մուտքերն արգելափակելու կոչին արձագանքել էր 1100 մարդ, Հովսեփյանը նշեց.

«Անընդհատ շահարկվում է 1100 հոգին. էստեղ խնդիրը դրված չի եղել՝ ժողովրդի լայն մասսաներին բերել դատարան։ Ժողովրդի պահանջն իրականում եղել է ավելի վաղ՝ մեկ տարի առաջ։ Այսօր երկուսը համադրվում է՝ ժողովրդի պահանջն ու իշխանության ցանկությունը»։

Հարցին՝ եթե մեկ տարի առաջ է եղել, ինչո՞ւ է հենց հիմա դարձել խիստ անհրաժեշտ, արդյո՞ք ՀՀ երկրորդ նախագահի խափանման միջոցի փոփոխության պատճառով, պատգամավորը պատասխանեց, որ այս մասին պարբերաբար քննարկումներ եղել են, «սակայն գործողությունների առումով՝ սկսվել է վերջին գործողություններին համընթաց»։

Գևորգ Պետրոսյանը, սակայն, հակադարձեց գործընկերոջը՝ ասելով.

«Եթե իսկապես գործող կառավարությունն այդ անցումային արդարադատության այդպիսի հրատապ ներդրումը համարում է անհրաժեշտություն, բա ինչո՞ւ այդ մասին որևէ տառ չկա կառավարության գործունեության ծրագրում։ Եվ այստեղ մենք հիմքեր ունենք ենթադրելու, որ էդ գործընթացը ոչ թե էդպես տրամաբանորեն, օրինաչափորեն, հանգիստ ընթացել է, այլ պարզապես սա եղել է ինչ-որ գործընթացների արագ արձագանքելու միջոց։

3 միլիոնանոց ժողովրդի մեջ, եթե 1100 հոգի գալիս է դատարանների դռներ փակելու, Սահմանադրությանը հակասող գործողություններ են իրականացնում, սա չի կարելի ներկայացնել՝ ժողովրդի կարծիք, բա ժողովրդի մի զգալի հատվածն էլ քննադատում է այս ամեն ինչը, բա նրա՛նց հետ ինչու հաշվի չեք նստում»։

Մանրամասները՝ տեսանյութում

Զարուհի Դիլանյան