Եղվարդի խճուղում փակվել է շրջադարձի համար չնախատեսված ճանապարհի միջանկյալ հատվածը

Երևանի քաղաքապետարանն, արձագանքելով Ճանապարհային ոստիկանության առաջարկին, սկսել է Եղվարդի խճուղու միջանկյալ հատվածի բարեկարգման աշխատանքները. ճանապարհի այս հատվածում, որտեղ հաճախ տեղի էին ունենում ճանապարհատրանսպորտային պատահարներ, կձևավորվի կանաչ գոտի: Այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից։

«Եղվարդի խճուղում հաճախակի դարձած ճանապարհատրանսպորտային պատահարներից խուսափելու նպատակով Ճանապարհային ոստիկանությունը դիմել էր Երևանի քաղաքապետարան՝ շրջադարձի համար չնախատեսված ճանապարհի միջանկյալ հատվածը փակելու առաջարկով: Չնայած, որ խճուղու աջ և ձախ կողմերից շրջադարձ կատարելու համար կան հատուկ կահավորված հատվածներ, հաճախ վարորդներն ընտրում էին կարճ ճանապարհը:

«Վարորդները հարակից բակերից, գազալցակայանից միանգամից դուրս են գալիս և շրջադարձ են կատարում չթույլատրված վայրով, որի հետևանքով տեղի են ունենում ճանապարհատրանսպորտային պատահարներ»,- նշում է ՀՀ ՃՈ ճանապարհային երթևեկության կազմակերպման հսկողության բաժնի պետ Կոնստանտին Կոստանյանը:

Արձագանքելով Ճանապարհային ոստիկանության առաջարկին՝ Երևանի քաղաքապետարանն արդեն սկսել է խճուղու միջանկյալ հատվածի բարեկարգման աշխատանքները: Ճանապարհի այս հատվածում կձևավորվի կանաչ գոտի:

«Ճանապարհային ոստիկանության կողմից բազմաթիվ ահազանգեր ունեինք այս հատվածի հետ կապված: Վաղն արդեն կավարտենք եզրաքարերի տեղադրումը, որից հետո կիրականացվեն հողային ու կանաչապատման աշխատանքներ: Այս հատվածում կձևավորվի սիզամարգ, կտնկվեն ծառեր»,- նշել է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը:

«Շատ օպերատիվ արձագանք եղավ, անմիջապես սկսվեցին աշխատանքները: Այսուհետ այս հատվածում ճանապարհատրանսպորտային պատահարներ չենք ունենա, որոնք շատ հաճախ հանգեցնում են մարմնական վնասվածքների, իսկ առանձին դեպքերում նաև խլում են մարդկային կյանքեր»,- ասել է Կոնստանտին Կոստանյանը:

Եվս մեկ անգամ կոչ ենք անում մեր համաքաղաքացիներին մեքենա վարելիս լինել մշտապես զգոն և հետևել ճանապարհային երթևեկության կանոններին»,- նշված է հաղորդագրության մեջ: