Ի՞նչ տեսանյութ է շրջանառվում Սանասարյանի գործով. Վանեցյանը այն դրել է Փաշինյանի սեղանին
Այն մեղադրանքը, որ առաջադրվել է Դավիթ Սանասարյանին, հիմնավորված է ցուցմունքներով, կատարված առերեսումներով: Բայց չխախտելով պարոն Սանասարյանի անմեղության կանխավարկածը, հորդորում եմ բոլորին՝ մի քիչ համբերել, երբ գործն արդեն կուղարկվի դատարան, որտեղ բոլորդ եւ հանրությունը հնարավորություն կունենան ծանոթանալ այն ապացույցների հետ, որոնք ձեռք են բերվել նախաքննության ընթացքում, որից հետո բոլորը կարող են գնահատել այդ ապացույցների իսկությունը»,-երեկ հայտարարել է ԱԱԾ տնօրեն Արթուր Վանեցյանը:
Ըստ «168 ժամ»-ի աղբյորների՝ աղմկահարույց այս քրեական գործի քննության այն փուլում, երբ ըստ ԱԱԾ-ի՝ բավարար հիմքեր են ի հայտ եկել Սանասարյանին մեղադրյալ ճանաչելու համար, վարչապետ Փաշինյանն ընդդիմացել է եւ փաստարկներ է պահանջել ԱԱԾ տնօրենից: Եվ հակառակ նրա սպասումների՝ փաստարկները, որ դրվել են նրա սեղանին՝ ոչ միայն տրցակներով նյութեր են եղել, այլեւ տեսանյութ, որում հստակ երեւում է Սանասարյանին հաստ տրցակներով գումարներ փոխանցելու դրվագը:
Ի դեպ, ըստ նույն աղբյուրների, անցած շաբաթ կառավարական ամառանոց Փաշինյանի հետ Սանասարյանին հանդիպման հրավիրելու առիթը հենց այս տեսանյութն է եղել: Փաշինյանը փորձել է տետ-ա-տետ խոսել եւ պարզաբանումներ պահանջել հեղափոխական բարձրաստիճան պաշտոնյայից:
Դավիթ Սանասրյանը լրագրողների հետ զրույցում հաստատել էր հանդիպման փաստը, սակայն մանրամասներ չէր ներկայացրել:
Պետք է նկատել, որ մինչև վերջին օրերն իշխանական «Իմ քայլը» խմբակցության պատգամավորները խուսափում էին անդրադառնալ Դ. Սանասարյանին ՊՎԾ գործով ներգրավելու և նրան պաշտոնանկ անելու որոշմանը, սակայն մեզ հետ զրույցում նրանցից շատերը զգուշորեն հաստատում էին տեսանյութի առկայության մասին շրջանառվող վարկածը:
Ի դեպ, բացառված չէ նաև հակառակ վարկածը: Օրինակ, այն, որ կարող էր նույն տեսանյութի մասին ինֆորմացիան հատուկ դրվել շրջանառության մեջ՝ հանրային կարծիքի չեզոքացման նպատակով, գուցե նաև այն բանի համար, որ Սանասարյանին արդարացնող, հեղափոխականների մեջ հակառակ բևեռն անցած խմբավորումը նահանջի ԱԱԾ պետի հրաժարականի պահանջից և առհասարակ ԱԱԾ-ն վարկաբեկելու ջանքերից:
Փորձեցինք նշված տեսանյութի առկայության մասին տեղեկությունը ճշտել Դ. Սանասարյանի փաստաբանից:
Նա ասաց, որ տեղյակ չէ, այդ թվում՝ ամառանոցային հանդիպման մասին, իսկ վարչապետի խոսնակ Վլադիմիր Կարապետյանն արդեն երրորդ օրն է՝ փորձում է ճշտել հարցումը, սակայն մինչ այս պահը որևէ պատասխան չենք ստացել:
