Փաշինյանի «սրտի բլոգեր» Georg X-ը մեղադրյալի կարգավիճակ ունի
Արդեն տևական ժամանակ է՝ «Georg X» կեղծանվամբ հանդես եկող բլոգերը, որը սոցիալական ցանցերում աչքի է ընկնում Նիկոլ Փաշինյանի իշխանության և իշխանական օրակարգի ակտիվ պաշտպանությամբ, փորձում է ներկայանալ նաև որպես քաղաքագետ։
Նիկոլ Փաշինյանի իշխանության աջակից բլոգերների շրջանում ակտիվություն ցուցաբերող այս երիտասարդը հատկապես հայտնի է իր հրապարակումներով, որոնցում քաղաքական դիրքորոշումները հաճախ ուղեկցվում են կոշտ, վիրավորական և անպարկեշտ բառապաշարով։ Նրա հրապարակումների և տարածած տեսանյութերի բովանդակությունը, ինչպես նաև օգտագործվող բառապաշարը բազմաթիվ հարցեր են առաջացնում նաև նրա՝ որպես «քաղաքագետ» ներկայանալու վերաբերյալ։
Միևնույն ժամանակ, «Georg X»-ի հրապարակումներում պարբերաբար կարելի է տեսնել նաև այնպիսի վարքագիծ, երբ նա իրեն վերագրում է գործողություններ կամ լիազորություններ, որոնք օրենքով վերապահված են պետական համապատասխան մարմիններին և պաշտոնատար անձանց։
Սակայն այս պատմության առավել ուշագրավ հատվածը նրա քաղաքական գործունեությունը չէ, այլ ճանապարհային երթևեկության կանոնների հնարավոր խախտումները։
168.am-ի տեղեկություններով՝ տվյալ անձը զրկված է եղել վարորդական իրավունքից, սակայն դրանից հետո շարունակել է վարել 37 ED 698 պետական համարանիշով տրանսպորտային միջոց։
Ավելին՝ սոցիալական ցանցերում հրապարակված տեսանյութերից մեկում մեքենայի վրա տեսանելի են առկայծող փարոսիկներ և ձայնային ուժեղացուցիչներ։
168.am-ի տեղեկությունների համաձայն՝ նշված սարքավորումներն օգտագործվել են նաև երթևեկության ընթացքում։
Ականատեսների փոխանցմամբ՝ վարորդը, օգտագործելով առկայծող փարոսիկներն ու ձայնային ազդանշանները, փորձել է ուղղորդել ճանապարհի մյուս մասնակիցների երթևեկությունը՝ պահանջելով շարժվել աջ կամ ձախ գոտիով, և շարունակել է իր ճանապարհը։
Այսինքն՝ իշխանության ակտիվ աջակից և իրեն նաև «քաղաքագետ» ներկայացնող բլոգերի դեպքում հարց է առաջանում՝ արդյո՞ք քաղաքական իշխանությանը սատարելու հանգամանքը նրան թույլ է տալիս իրեն վերապահել այնպիսի լիազորություններ, որոնք օրենքով նրան տրված չեն։
Հատկանշական է նաև, որ խնդրին իրավական գնահատական արդեն տվել են իրավապահ մարմինները։
ՀՀ ՆԳՆ-ից 168.am-ին հայտնել են, որ նշված տրանսպորտային միջոցի վարորդը հայտնաբերվել է, և փաստի առթիվ կազմվել են վարչական իրավախախտման վերաբերյալ արձանագրություններ։
ՆԳՆ-ն հաստատել է նաև, որ տվյալ անձը վարորդական իրավունքից զրկված է եղել։
Ավելին՝ կազմված նյութերը փոխանցվել են Քննչական կոմիտե՝ քրեական վարույթ նախաձեռնելու հարցը լուծելու նպատակով։
168.am–ը հարցում է ուղարկել Քննչական կոմիտե՝ պարզելու՝ ի՞նչ ընթացք են ստացել ՆԳՆ-ի կողմից փոխանցված նյութերը, արդյո՞ք նախաձեռնվել է քրեական վարույթ, և ի՞նչ իրավական գնահատական է տրվել արձանագրված հանգամանքներին։
Քննչական կոմիտեից 168.am-ի հարցմանն ի պատասխան՝ հայտնել են. «Տրանսպորտային միջոցներ վարելու իրավունք չունենալու և օրենքով սահմանված պատասխանատվության կիրառումից հետո մեկ տարվա ընթացքում նույն արարքը կատարելու վերաբերյալ ստացվել է երկու հաղորդում, որոնցից մեկով՝ մեղադրական եզրակացությամբ ուղարկվել է դատարան։ Մյուս քրեական վարույթի նախաքննությունը շարունակվում է։
Մեղադրանքը ներկայացվել է ՀՀ Քրեական օրենսգրքի 344-րդ հոդվածով` տրանսպորտային միջոցներ վարելու իրավունքից զրկված կամ այդ իրավունքը կասեցված կամ տրանսպորտային միջոցներ վարելու իրավունք չունեցող անձի կողմից տրանսպորտային միջոցներ վարելը»:
Փաստացի Նիկոլ Փաշինյանի «սրտի բլոգեր»-ն ունի մեղադրյալի կարգավիճակ: Այսպիսով, իշխանության ամենաակտիվ աջակիցներից մեկի վարքագիծը, որը սոցիալական ցանցերում հաճախ ուղեկցվում է ագրեսիվ և անպարկեշտ բառապաշարով, այժմ նաև իրավապահների ուշադրության կենտրոնում է հայտնվել՝ վարորդական իրավունքից զրկված վիճակում մեքենա վարելու և տրանսպորտային միջոցի վրա հատուկ ազդանշանային սարքավորումների օգտագործման հանգամանքների մասով։
Սպասենք դատարանի կողմից օրինական ուժի մեջ մտած վճռին, արդյո՞ք այն կկայացվի:
