Երեք մարդ է զոհվել Նեպալում ինքնաթիռի և ուղղաթիռի բախման պատճառով
Երեք մարդ է զոհվել, եւս չորսը՝ տուժել ապրիլի 14-ին Նեպալի Տենցինգի եւ Հիլարիի անվան օդանավակայանում այն բանից հետո, երբ Twin Otter մակնիշի թեթեւշարժիչավոր ինքնաթիռը վերթիռի ժամանակ բախվել է գետնին կանգնած ուղղաթիռին: Այդ մասին հայտնել է 9 News լրատվական պորտալը:
Նրա տվյալներով՝ միջադեպի հետեւանքով, որը տեղի է ունեցել Էվերեստի մերձակա ոչ մեծ օդանավակայանում, զոհվել է Summit Ai մասնավոր ընկերության ինքնաթիռի օդաչուն, ինչպես նաեւ երկու ոստիկան, որոնք կանգնած էին Manang Air ընկերության ուղղաթիռի կողքին: Հայտնի է, որ ինքնաթիռում, որն ուղեւորվում էր Կատմանդու, գտնվում էին չորս ուղեւոր եւ ուղեկցորդուհին, նրանց կյանքին վտանգ չի սպառնում:
Տենցինգի եւ Հիլարիի անվան օդանավակայանը գտնվում է ծովի մակարդակից 2860 մետր բարձրության վրա եւ աշխարհի ամենավտանգավոր ավիահանգրվաններից մեկն է համարվում կարճ թռիչքավայրէջքային գոտու եւ շրջակա լեռնային լանդշաֆտի եւ հաճախ փոփոխվող եղանակով պայմանավորված վատ տեսանելիության պատճառով, հաղորդել է ՏԱՍՍ-ը:
