Վարդաքարցիները դաշտերը մեխապատել են
Tsayg.am-ը գրում է. Գարունը բացվել, ցանքը մեկնարկել է: Վարդաքարում գյուղատնտեսական նոր տարին եկել է, բայց հին խնդիրները դեռ լուծված չեն: Խոսքը համայնքի ցանքանտարածությունների հետ է կապված: Բանն այն է, որ Վարդաքարն Այգաբացին կապող ճանապարհն անանցանելի է, վարորդներն էլ դաշտերի միջով նոր ճանապարհ են բացել:
3 կմ ընդհանուր երկարություն ունեցող ճանապարհահատվածը շարքից դուրս է եկել: Գոյացած հսկայական փոսերի միջով անցնելն էլ՝ գրեթե անհնար: Դա է պատճառը, որ վարորդները փորձում են շրջանցել:
Բնակիչները ելքը գտել են: Դաշտավայրերի մեջ մեխեր են ամրացրել, որ մեքենաները չկարողանան ցանքերը տրորել, կամ էլ դաշտ մտնելու դեպքում անիվները ծակվեն: Այդ կերպ բնակիչները փորձում են դաս տալ կարգազանց վարորդներին:
