«Մենք ունենք կենսական շահեր ԵԱՏՄ տարածքի հետ». Տիգրան Խաչատրյան
2018թ. Հայաստանից ընդհանուր 2.4 մլրդ դոլար արտահանումներից մոտ 680 մլն դոլարն իրականացվել է ԵԱՏՄ երկրներ։ Այս մասին այսօր ԱԺ Տարածաշրջանային և եվրասիական ինտեգրման հարցերի մշտական հանձնաժողովի նիստում հայտարարեց ՀՀ տնտեսական զարգացման և ներդրումների նախարար Տիգրան Խաչատրյանը։
Ըստ նրա՝ եթե ընդհանուրից հանվի հանքահումային արտադրանքը՝ մոտ 800 մլն դոլար, ապա արտահանումների գրեթե կեսը բաժին է ընկնում ԵԱՏՄ երկրներին։ Նա կարևորեց, որ այս ուղղությամբ արտահանվում է պատրաստի արտադրանք։
«Ներմուծման առումով մենք ունենք կենսական շահեր ԵԱՏՄ տարածքի հետ, ընդհանուր ներմուծման մոտ 1/4-ը կամ 1.2 մլրդ ներկրում ենք ԵԱՏՄ երկրներից, այդ թվում՝ էներգակիրներ և լայն սպառման ապրանքներ»,- ասաց նախարարը։
Նա նշեց, որ երրորդ երկրներից ներմուծման ժամանակ մաքսային վճարների հետ կապված Հայաստանի վերցրած արտոնյալ ժամանակահատվածն ավարտված է, և այս տարվա հունվարի 1-ից, օրինակ, ադամանդի ու ոսկու ներմուծման դեպքում կիրառվում է 3%-անոց մաքսատուրք, որը 2020 թ.-ին կդառնա 6%, 2021 թ.-ին՝ 10%՝ ադամանդների, և 9%՝ ոսկե իրերի համար, 2022 թ.-ին՝ 15%՝ ոսկե իրերի համար. «Այդպիսով՝ ավարտվելու է այդ անցումային ժամանակահատվածը, և մենք ունենալու ենք Հայաստանում գործող ԵԱՏՄ կողմից սահմանված ընդհանուր տարիֆային միջակայքը»։
Տ.Խաչատրյանը նշեց, որ տարիֆների բարձրացումը շահավետ կլինի ալմաստ Հայաստան ներիկրող և դեպի ԵԱՏՄ ադամանդ արտահանողների համար, իսկ եվրոպական ուղղությամբ աշխատողների համար՝ ոչ, սակայն տնտեսության օրենքն է, որ հնարավոր չի բոլորը շահեն կամ բոլորը տուժեն. «Քաղաքականության ընտրությունը մեր խնդիրն է»։
