«Երևի թե Սերժ Սարգսյանի ու իր կողմնակիցների համար դա նույնիսկ լավ է, քանի որ ողջ աշխարհին ակնհայտ ժողովրդավարություն են ցուցադրում». Գրիգորի Տրոֆիմչուկ

«Երևի թե Սերժ Սարգսյանի ու իր կողմնակիցների համար դա նույնիսկ լավ է, քանի որ ողջ աշխարհին ակնհայտ ժողովրդավարություն են ցուցադրում». Գրիգորի Տրոֆիմչուկ

168.am-ի զրուցակիցն է անվտանգության և քաղաքական հարցերով մասնագիտացած ռուս քաղաքագետ Գրիգորի Տրոֆիմչուկը

– Պարոն Տրոֆիմչուկ, մարտի 31-ից «Քաղաքացիական պայմանագիր» կուսակցության առաջնորդ, ԱԺ «Ելք» խմբակցության ղեկավար Նիկոլ Փաշինյանը քայլերթ սկսեց Գյումրի քաղաքից դեպի Երևան՝ ընդդեմ ՀՀ երրորդ նախագահ Սերժ Սարգսյանի հնարավոր վարչապետության: Ապրիլի 16-ին նա անցում կատարեց ակտիվ գործողությունների՝ արգելափակելով քաղաքային տրանսպորտի աշխատանքը, նախատեսելով ԱԺ շենքի մուտքի արգելափակում, որը հանգեցրեց ՀՀ Ոստիկանության հետ բախման: Ինչպե՞ս եք գնահատում այս իրադարձությունները: Ի ՞նչ արդյունքների կարող են հանգեցնել այս գործողությունները:

– Ինչպես հայտնի է, հայկական ընդդիմության գլխավոր խնդիրն այն է, որ ընդդիմության շարքերում չկան հզոր առաջնորդներ: Հակառակ դեպքում ընդդիմությունն արդեն հասած կլիներ իր նպատակներին, քանի որ հայաստանյան հասարակության և բնակչության վերաբերմունքն իշխանության նկատմամբ չի կարելի համարել, մեղմ ասած, չափազանց հարգալից: Պարզապես հասարակությունը դեռ չի տեսնում այն ֆիգուրներին, որոնք կարող էին ինչ-որ բանի լրջորեն հավակնել:

Այսօրվա բողոքի ցույցերը, ամենայն հավանականությամբ, ինչ-որ առումով նախորդից ավելի մարդաշատ էին կամ ընդհակառակը՝ այդ բոլոր ցույցերը կառուցվում են և ընթանում համարյա նույն սցենարով: Փաշինյանին և իր աջակիցներին չհաջողվեց խուսափել Ոստիկանության հետ բախումներից, թեև նա ձգտում էր մնալ խաղաղ ձևաչափում:

Ամեն դեպքում, հաշվի առնելով այն փաստը, որ Հայաստանը հասարակության մտածելակերպի և իշխանության նկատմամբ իր վերաբերմունքի առումով ակնհայտորեն տարբերվում է Ռուսաստանից, Ղազախստանից կամ Բելառուսից, պետք չէ անլուրջ վերաբերվել Հայաստանում մոտ ապագայում հնարավոր քաղաքական իրադարձությունների հեռանկարին:

Աշխարհաքաղաքականությունն իր բացասական ազդեցությամբ շարունակելու է ճնշել Հայաստանին ավելի ու ավելի ուժեղ, և այդ իրավիճակը հրահրելու է նոր բողոքի ակցիաներ: Ուստի ՀՀԿ-ն չպետք է բավարարվի այն փաստով, որ մոտավորապես իրագործել է` պլյուս-մինուս, իշխանության փոխանցման նույն սցենարը, որը տեղի է ունեցել իմ կողմից նշված երկրներում:

Նկատելի է նաև մեկ այլ փաստ, որ ընդդիմությունը սկսել է իր քայլերթը Գյումրիից, որտեղ, ինչպես գիտեք, տեղակայված է ռուսական ռազմաբազան: Կարծում եմ` դա պատահականություն չէ:

– Ի՞նչ եք կարծում` իշխող կուսակցության ծրագրերը չե՞ն փոխվի:

– Իշխող կուսակցությունը դեռ չի տեսնում իր համար խնդիրներ, քանի որ Հայաստանը սովոր է մասսայական հանրահավաքների, որոնք չեն համարվում ինչ-որ արտակարգ երևույթ: Երևի թե Սերժ Սարգսյանի ու իր կողմնակիցների համար դա նույնիսկ լավ է, քանի որ ողջ աշխարհին ակնհայտ ժողովրդավարություն են ցուցադրում, երբ յուրաքանչյուրը կարող է իր կարծիքն արտահայտել: Եթե ընդդիմությունը ցանկանում էր Սարգսյանի և ՀՀԿ-ի համար լուրջ խնդիրներ ստեղծել, ապա պետք էր այդ խնդիրները ստեղծել ավելի վաղ, երբ օրենքներ էին ընդունվում իշխանության կառուցվածքի վերաբերյալ: Իսկ ներկայումս իշխող կուսակցության համար ամեն բան ավելի հեշտ է:

– Ինչպիսի՞ն է ՌԴ իշխանությունների դիրքորոշումն այս զարգացումների վերաբերյալ:

– Մոսկվայում Հայաստանի ընթացիկ իրադարձություններին մեծ ուշադրություն չեն հատկացնում, բացառությամբ փորձագիտական հանրության մի մասի, որը միշտ տեղյակ է հայաստանյան թեմատիկայից: Ռուսաստանյան տեղեկատվական դաշտում այս թեման չկա: Մեծ հաշվով, Մոսկվան այն գծի կողմնակիցն է, որն իրականացնում է Հայաստանի Հանրապետական կուսակցությունը, նկատի ունենալով Սերժ Սարգսյանի և իշխանության այլ ներկայացուցիչների կողմից իշխանական լծակների պահպանումը:

Հայաստանի ներքաղաքական կյանքում ցանկացած կտրուկ փոփոխություն ավտոմատ կերպով կանդրադառնա ստրատեգիական խնդիրների ողջ համակարգի վրա` Հայաստանում Արևմուտքի ազդեցության ընդլայնում, փոփոխություն ԵՄ-ԵԱՏՄ դաշտում, այսինքն՝ Ռուսաստանին մոտ անկայունության մեկ այլ օջախի թեժացում:

Մոսկվային ձեռնտու է այս երկրում համակարգային անվտանգությունը, այդ թվում՝ ուղիղ կերպով Գյումրիում ՌԴ ռազմական բազայի հետ կապված, ինչպես արդեն ասացի, որը ոչ մի կերպ չի հեռանում հայաստանյան ընդդիմության տեսադաշտից, և այս ուղղությամբ ճնշումը մշտապես ուժեղանում է: Քանի որ ցանկացած ապակայունացում, նույնիսկ այն դեպքում, երբ ընդդիմադիրները հրապարակային կերպով հայտարարեն, որ նրանք բացարձակ դեմ չեն Ռուսաստանին, կարող է ցնցել ամեն ինչ:

Գովազդ
Լրահոս
Ամենաընթերցված
ՕրվաՇաբաթվաԱմսվա
2017-11-28
Ի՞նչ կտա Հայաստանի սովորական քաղաքացիներին ՀՀ-ԵՄ համաձայնագիրը
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին երեկ լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։