Արտակ Զեյնալյանը կոչ արեց հակասություններ չփնտրել Հայաստանի իրավական համակարգի, ընդհանուր արժեհամակարգի և ԵՄ միջև համաձայնագրի միջև
Ազգային ժողովի «Ելք» խմբակցության պատգամավոր Արտակ Զեյնալյանը բարձր է գնահատում Հայաստանի և Եվրոպական Միության միջև «Համապարփակ և ընդլայնված գործընկերության մասին» համաձայնագիրը: Ազգային ժողովում համաձայնագիրը վավերացնելու հարցի քննարկման ընթացքում Արտակ Զեյնալյանն ընդգծեց, որ համաձայնագրով Հայաստանի իրավական համակարգը նմանեցվում է եվրոպական իրավական համակարգին:
«Այս ամենը կարելի էր անել առանց այս համաձայնագրի՝ մոտեցնել, նմանեցնել մեր երկրի իրավական համակարգը եվրոպական իրավական համակարգին, սակայն պետությունները նաև իրենց մոտ այս փոփոխությունների վերահսկողությունը վերապահում են վերպետական կառույցներին, որպեսզի կողմնակի օբյեկտիվ աչքով դրանք վերահսկվեն և իրականացվեն:
Այդ առումով ես բարձր եմ գնահատում այս համաձայնագիրը, որի նկատմամբ վերահսկողությունը իրականացնելու է Եվրոպական Միությունը»,- նշեց Զեյնալյանը:
Նա ևս մեկ անգամ ողջունեց համաձայնագիրը և կոչ արեց հակասություններ չփնտրել Հայաստանի իրավական համակարգի, ընդհանուր արժեհամակարգի և Եվրոպական Միության միջև համաձայնագրի միջև:
