«Լավ կլինի՝ հարկերի մեծ մասը հենց Շիրակի մարզում հավաքենք». տնտեսագետ

Այսօր Գյումրու քաղաքապետարանում 2017 թվականի համայնքի բյուջեի վերաբերյալ հանրային քննարկում էր կազմակերպվել:

Արդյո՞ք արդյունավետ է ծախսվել Գյումրու 2017 թվականի բյուջեն:

Իրականացված ծախսերի և բյուջետային հիմնական ցուցանիշների վերաբերյալ տվյալները ներկայացրեց Գյումրու քաղաքապետարանի գլխավոր ֆինանսիստ Լենա Ջիլավյանը՝ անդրադառնալով Գյումրու բյուջեի տնտեսված գումարների հաշվին անօթևանների համար սոցիալական բնակարաններ կառուցելու անհրաժեշտությանը:

Գյումրու համայնքապետարանը քաղաքի բյուջեի ազատ միջոցներից 15 միլիոն դրամ կտրամադրի Բուլվարային թաղամասի նախկին Ռադիոգործարանի շենքը գնելու համար: Այս որոշումը հավանության էր արժանացել Գյումրու ավագանու վերջին նիստի ընթացքում: Ներդրողների աջակցությամբ քաղաքապետարանն այստեղ սոցիալական բնակարաններ է կառուցելու:

Անդրադառնալով Գյումրու բյուջեն լրացուցիչ գումարներով համալրելու անհրաժեշտությանը, Հայաստանի պետական տնտեսագիտական համալսարանի Գյումրու մասնաճյուղի տնօրեն Սամսոն Դավոյանը 168.am-ի հետ զրույցում նշեց, որ մենք պետք է համեմատենք տված արդյունքը սպասված արդյունքի հետ: Բացի դրանից, պետք է վերլուծենք՝ ի՞նչ միջոցառումներ էր նախատեսված իրականացնել քաղաքի բյուջեի միջոցներով, և արդյո՞ք դրանք կատարվել են:

Վերջինիս խոսքով՝ բյուջետային օրենսդրության մեջ ներդրումային, զարգացման հոդվածներ կան, որոնք կարելի է կիրառել:

«Մնեք պետական բյուջեից շատ մեծ դոտացիա ենք ստանում, ինչը բյուջետային վարչարարության մասին լավ բան չի ասում: Ճիշտ է, օրենքով նախատեսված է, որ մենք պետական բյուջեից պետք է դոտացիա ստանանք, սակայն լավ կլինի՝ հարկերի մեծ մասը հենց Շիրակի մարզում շատ հավաքենք: Ստացվում է՝ մեր աշխատանքից մեր ստացածը կախված չէ: Սա բյուջետային համակարգի ամենամեծ թերությունն է»,- փաստում է տնտեսագետը:

Ս. Դավոյանից հետաքրքրվեցինք՝ ինչո՞ւ են, օրինակ, Ախուրյան համայնքում բյուջեից մեկ շնչին բաժին հասնող գումարներն ավելի շատ, քան Գյումրու պարագայում, չէ՞ որ Գյումրին արդյունաբերական քաղաք է:

«Ախուրյանը սոցիալական ծրագրեր է իրականացնում բյուջեի գումարներից դուրս, միջազգային վարկերի, դրամաշնորհների հաշվին, դրա համար էլ մեկ բնակչի հաշվով բյուջեի ծախսերն ավելի շատ են, քան Գյումրիում»,- ասաց Ս. Դավոյանը:

Ինչ վերաբերում է համայնքի բյուջեի հաշվին աշխատատեղերի ստեղծմանը, տնտեսագետը նշում է, որ դրանով ավելի շատ մասնավոր ներդրողները պետք է զբաղվեն, ոչ թե քաղաքապետարանը: Եթե անգամ համայնքի բյուջեի միջոցներով փոքր արհեստանոցներ բացվեն, ապա դրանք քաղաքապետարանի ենթակայության ներքո կլինեն:

Անահիտ Սիմոնյան