Հայկական ՏՀՏ-ի ներկայացուցչական գրասենյակներ՝ ԱՄՆ-ում, Ֆրանսիայում, Բելգիայում և Բոլիվիայում

Armenian Science & Technology Center ծրագրի շրջանակներում հայկական ՏՀՏ ոլորտի ներկայացուցչական գրասենյակներ են բացվել 4 երկրներում՝ ԱՄՆ-ում, Ֆրանսիայում, Բելգիայում ու Բոլիվիայում:

Մայիսի 21-28-ը Հայաստան կժամանի առաջին պաշտոնական պատվիրակությունը Բոլիվիայից: Պատվիրակության ներկայացուցիչները հուշագրեր ստորագրելու նպատակով հանդիպումներ կունենան հայաստանյան գործընկերների հետ:

Հանդիպումներ տեղի կունենան նաև TSD ընկերության հետ`  հայկական հեռախոսների ու պլանշետների ներմուծման վերաբերյալ և ՏՏ ոլորտի մի շարք ընկերությունների հետ`ապրանքատեսականու ներմուծմանն առնչվող պայմանագրեր ստորագրելու, համագործակցության նոր նախաձեռնություններ քննարկելու համար:

Մեկ ամսից ավելի է՝ TSD ընկերությունն ASTC ծրագիրը կազմակերպելու համար հավաքագրում է կամավորների` ապագա աշխատակիցների: Վերջիններս շաբաթական մի քանի անգամ մասնակցում են վերապատրաստման դասընթացների: Արդեն կազմավորված է 30  մասնագետից բաղկացած երկու խումբ, որոնցից կընտրվեն համապատասխան մասնագետներ: Նրանք կաշխատեն Հայաստանում և արտերկրում:

Armenian Science & Technology Center  ծրագիրն առաջիկայում նախատեսվում է ներդնել ընդհանուր առմամբ 17 երկրներում:

Armenian Science & Technology Center  ծրագիրն իրականացվում է  ՀՀ տրանսպորտի, կապի և տեղեկատվական տեխնոլոգիաների նախարարության և «Թեքնոլոջի ընդ Սայնս Դայնամիքս» ընկերության միջև կնքված  «ՏՏ, տեղեկատվայնացման, հեռահաղորդակցության և ինովացիոն ոլորտների խթանման մասին» փոխըմբռնման հուշագրի համաձայն:

Սիրարփի Աղաբաբյան