«ԵՄ-ն Լոնդոնի հետ հարաբերությունները չի քննարկի նախքան Brexit-ի շուրջ որոշման ընդունումը». Տուսկ
ԵՄ-ն Մեծ Բրիտանիայի հետ ապագա հարաբերությունները չի քննարկի նախքան հանրակցությունից դուրս գալու պայմանների վերաբերյալ որոշման ընդունումը: Այդ մասիԵվրոպական խորհրդի ղեկավար Դոնալդ Տուսկը հայտարարել է ԵՄ-ի ղեկավարներին ուղղված նամակում՝ հրավիրելով Brexit-ին նվիրված գագաթնաժողովին, որը Բրյուսելում տեղի է ունենալու ապրիլի 29-ին: Մեծ Բրիտանիան այդ հանդիպմանը չի հրավիրված, քանի որ ԵՄ-ում մնացած երկրների ղեկավարների բանավեճը նվիրված է լինելու Լոնդոնի հետ առաջիկա բանակցություններում ընդհանուր բանակցային դիրքորոշման մշակմանը:
«Նախքան մեր ապագան քննարկելը, մենք պետք է կարգավորենք անցյալի հարցերը»,-հայտարարել է Տուսկը:Մեզ անհրաժեշտ է փուլային մոտեցում, ինչը նշանակում է, որ մենք Մեծ Բրիտանիայի հետ մեր ապագա հարաբերությունները չենք քննարկի, քանի դեռ զգալի առաջընթացի չենք հասել գլխավոր հարցերի շուրջ, որոնք կապված են ԵՄ-ից Մեծ Բրիտանիայի դուրս գալու կարգի հետ: Դա միակ հնարավոր մոտեցումն է՝ հաշվի առնելով ժամանակի սահմանափակումները»,-ասել է Տուսկը:
Եվրախորհրդի ղեկավարը վերստին կրկնել է Brexit-ի նկատմամբ ԵՄ-ի երեք հանգուցային դիրքորոշումները: Նախ, Բրյուսելը ձգտելու է հասնել Մեծ Բրիտանիայում ապրող ու աշխատող ԵՄ-ի քաղաքացիների եւ նրանց ընտանիքների անդամների համար լիակատար սոցիալական երաշխիքների ապահովման: Երկրորդ, Բրյուսելը ձգտելու է հասնել Լոնդոնի կողմից իր բոլոր ֆինանսական պարտավորությունների կատարմանը, որոնք ընդունվել են Եվրամիության կազմում: Երրորդ կետը կդառնա Իռլանդիայի եւ թագավորության կազմի մեջ մտնող Հյուսիսային Իռլանդիայի միջեւ սահմանի հայտնվելու անթույլատրելիությունը:
«Նախ պետք է առաջընթաց ձեռք բերվի մարդկանց, փողերի եւ Իռլանդիայի վերաբերյալ: Այնուհետեւ, հենց որ Եվրոպական խորհուրդը (ԵՄ-ի գագաթնաժողով) որոշի, որ զգալի առաջընթաց է ձեռք բերված այդ բոլոր հարցերի շուրջ, մենք նախապատրաստական բանակցություններ կսկսենք Մեծ Բրիտանիայի հետ մեր ապագա հարաբերությունների շուրջ»,-հայտարարել է Տուսկը:
Ապրիլի 29-ին Բրյուսելում կայանալիք գագաթնաժողովը պետք է հաստատի ԵՄ-ի բանակցային դիրքորոշման հիմնական դրույթները: Լիսաբոնի պայմանագրի համաձայն, հանրակցության կազմից երկրի դուրս գալու շուրջ բանակցություններին երկու տարի է հատկացվում՝ սկսած դուրս գալու մասին պաշտոնական ծանուցում տալու պահից: Այդ ծանուցումը Միացյալ Թագավորության վարչապետ Թերեզա Մեյը Եվրոպական
խորհրդին հանձնել է մարտի 29-ին, հաղորդել է ՏԱՍՍ գործակալությունը:
