Ջոն Քերին կդասավանդի Յելի համալսարանում
ԱՄՆ նախկին պետքարտուղար Ջոն Քերին հաջորդ ակադեմիական տարվանից կսկսի կրթական ծրագիր իրականացնել Յելի համալսարանում, հայտնում է Associated Press-ը։
Ծրագիրը նվիրված կլինի գլոբալ խնդիրների լուծմանը։
Հաղորդվում է, որ Քերին վարելու է սեմինարներ, որտեղ քննարկվելու են այնպիսի խնդիրներ, ինչպիսիք են փլուզվող պետությունները, բռնապետական ռեժիմները, ծայրահեղականությունը, կլիմայական փոփոխությունները։
Քերին ավարտել է Յելի համալսարանը 1966թ.։ Զբաղեցրել է ԱՄՆ պետքարտուղարի պաշտոնը 2013թ. մինչև 2017թ. հունվարը։
