«Օրինակ, երբ սելավը գա, ավերի ամեն ինչ, դա հրատապ է». Ե՞րբ կթույլատրվի մեկ անձից գնումներ կատարել
Այսուհետ Պաշտպանության նախարարությունը կամ որևէ այլ գերատեսչություն չի կարողանա մեդալի տուփեր կամ նոթատետրեր ձեռք բերել մեկ անձից կատարվող գնումների եղանակով: Ինչպես պետական գնումների մասին սեմինար-քննարկման ժամանակ ասաց ՀՀ ֆինանսների նախարար Վարդան Արամյանը, գնումների մասին օրենքի փոփոխության արդյունքում, որն ուժի մեջ է մտել այս տարվա հունվարի 1-ից, միայն նախագահի գրասենյակն իրավունք ունի մեդալի տուփեր գնել մեկ անձից, քանի որ հատուկ սպեցիֆիկացիա կա:
Ընդհանրապես, ըստ նախարարի՝ մեկ անձից կատարվող գնումներ կարելի կլինի իրականացնել միայն դրանց հրատապության դեպքում. «Օրինակ, երբ սելավը գա, ավերի ամեն ինչ, դա հրատապ է»:
Նա նշեց, որ մեկ անձից կատարվող գնումների համար բյուջեից հատկացումներն անցած տարի նախորդի համեմատ խիստ կրճատվել են, մասնավորապես` 2016թ. 6.6 մլրդ դրամ է եղել՝ 2015թ. 22 մլրդ-ի փոխարեն:
