Ադրբեջանի քաղաքացիները չեն վստահում բանկերին
Ադրբեջանի քաղաքացիները նախընտրում են իրենց գումարները պահել տանը, քան բանկերում: Այս մասին հայտնում է ադրբեջանական marja.az լրատվական կայքը:
Այս ամենը պարզվել է բնակչության շրջանում անցկացված սոցհարցման արդյունքում: Ադրբեջանի բնակչության շրջանում դեվալվացիաների եւ մի շարք բանկերի լուծարման պատճառով բանկերի նկատմամբ վստահությունը պակասել է:
Մարդիկ ավանդներ դնում են կամ Ավանդների հատուցումը երաշխավորող հիմնադրամի անդամ բանկերում, կամ գումարը պահում են իրենց մոտ:
2016 թվականի մարտի 2-ից սկսած Ավանդների հատուցումը երաշխավորող հիմնադրամի անդամ բանկերում արտարժույթի դեպքում 3 տոկոսով, իսկ տեղական արժույթի դեպքում 15 տոկոսով ընդունված ավանդները 3 տարի ժամկետով ապահովագրվում են:
Ապահովագրված ավանդների դեպքում բանկի լուծարման կամ այլ խնդրի պարագայում «ավանդների փոխատուցման» օրենքի համաձայն` ավանդատուի վնասը փոխատուցվում է ապահովագրական հիմնադրամի կողմից: Միայն այս տարվա հունվարհոկտեմբերին ադրբեջանում փակվել է մեկ տասնյակից ավելի բանկ:
Բանկերի լիցենզիաները չեղարկվել են այն բանի հետ կապված, որ նրանց գումարային կապիտալը չի համապատասխանում ԿԲ-ի կողմից պահանջվող չափին, ինչպես նաեւ այն պատճառով, որ բանկերն ի վիճակի չեն վարկատուների առաջ կատարել իրենց պարտավորությունները եւ ընթացիկ հուսալի ղեկավարում ապահովել:
Haqqin.az կայքն ավելի վաղ մեջբերել էր սոցցանցերում հայտնված ադրբեջանական բանկերից մեկի` Atlant Bank-ի` բանջարեղենի եւ մրգերի վաճառակետի վերածված լուսանկարը, որը հանդիսանում է Ադրբեջանի բանկային համակարգի անկման ակնառու օրինակ:
