Ալգորիթմը կարո՞ղ է օգնել պահպանել տեսողությունը. Google-ում վստահ են՝ այո

Արհեստական ինտելեկտի ուսումնասիրությամբ Google DeepMind ծրագիրը հետազոտում է՝ արդյոք իր տեխնոլոգիան կարո՞ղ է օգտագործվել՝ հայտնաբերելու համար աչքի հիվանդությունների վաղ ախտանիշները, որոնք հնարավոր է՝ ակնաբույժները չնկատեն։ Weforum.org կայքը գրում է, որ DeepMind-ը, որը ստեղծվել է Google-ի կողմից 2014թ., համաձայնագիր է ստորագրել Լոնդոնում գործող աչքի հիվանդանոցներից մեկի հետ, որը նրան հնարավորություն կտա կատարել ցանցաթաղանթի հետազոտություններ, որոնք ներառվելու են ծրագրի հավելվածում։

Ալգորիթմն աշխատելու է աչքի ամենատարածված երկու հիվանդությունների բացահայտման ուղղությամբ՝ տարիքային մակուլյար դեգեներացիա և դիաբետիկ ռեթինոպատիա, որոնցով տառապում է աշխարհի շուրջ 100 մլն բնակիչ։ Ներդրված տեխնոլոգիան կուսումնասիրի լուսանկարները և կփնտրի հիվանդության նշաններ։

Ակնաբուժական հիվանդանոցի ղեկավար Պենգ թի Կաոն նշել է, որ DeepMind-ի հետ կատարովող հետազոտությունը նպատակ ունի հեղափոխական քայլ կատարել այն մեթոդներում, որոնցով ակնաբույժներն անցկացնում են թեստերը, և կարող է հանգեցնել աչքի այնպիսի հիվանդության ավելի վաղ հայտնաբերմանն ու բուժմանը, ինչպիսին է տարիքային մակուլյար դեգեներացիան։
Ակնաբույժներն ակտիվորեն օգտագործում են օպտիկական կոհերենտային տոմոգրաֆիան՝ այս հիվանդությունները հայտնաբերելու համար։ Չնայած այս համակարգն ապահովում է ցանցաթաղանթի մանրամասն լուսանկարում, այն համակարգչային տեխնոլոգիա է և պահանջում է բուժաշխատողների հատուկ ուսուցում՝ վերլուծություն կատարելու համար։

Ըստ DeepMind-ի կայքի՝ դա է պատճառը, որ սովորաբար ախտորոշումը կարող է ավելի դանդաղ իրականացվել։ DeepMind-ի հեղինակները հավատում են, որ այս տեխնոլոգիան հնարավորություն ունի ավելի արագ ախտորոշել վտանգված հիվանդներին և կանխարգելել հետևանքները։
DeepMind-ը ակնաբուժական կլինիկայի հետ համագործակցության շրջանակներում չի վճարվելու և ամբողջական հասանելիություն ունի հիվանդների բժշկական տվյալներին։ Բոլոր տվյալները գաղտնի են պահվելու, ինչը նշանակում է, որ հնարավոր չի լինելու նույնականացնել անձի ինքնությունը։