Որ մասնագիտություններն են նախընտրել 2015/2016 ուստարվա դիմորդները

ՀՀ Ազգային վիճակագրական ծառայությունը տվյալներ է հրապարակել՝ ՀՀ բարձրագույն կրթության առաջին աստիճանի կրթական ծրագրեր իրականացնող
ուսումնական հաստատությունների գործունեության վերաբերյալ:

2015/2016 ուսումնական տարում հանրապետության 60 բարձրագույն պետական և ոչ պետական ուսումնական հաստատություններ (ԲՈւՀ) և 12 մասնաճյուղեր բարձրագույն կրթության առաջին աստիճանում իրականացրել են մասնագիտական կրթություն բակալավրի ծրագրերով:

60 հաստատություններից 48-ը գտնվում են Երևանում, 3-ը՝ Շիրակի մարզում, 2-ական՝ Արմավիրի, Գեղարքունիքի, Լոռու և Սյունիքի մարզերում, 1 հաստատություն՝ Կոտայքի մարզում։ Վայոց ձորի և Տավուշի մարզերում ինքնուրույն գործող բուհեր չկան, փոխարենը՝ այնտեղ գործում են այլ բուհերի մասնաճյուղեր։

Վերը թվարկված ուսումնական հաստատություններ  2015/2016 ուսումնական տարում ընդունվել է 18 061 մարդ։ Ընդունվածների մեծ մասը կանայք են՝ 52%։

Սովորող ուսանողների ընդհանուր թիվը 84 591 է։ Այս առումով կանանց առավելությունն առավել ակնհայտ է. ուսանողների 54.6%-ը իգական սեռի են։

Ամենաուշագրավ ցուցանիշներից մեկը ուսանողների թվաքանակի
շարժն է՝ ըստ մասնագիտությունների խմբերի։

2015/2016 ուսումնական տարում բուհ ընդունված 18061 անձանցից 5301-ը նախընտրել են հումանիտար գիտությունները։ Ըստ մասնագիտությունների՝ երկրորդ տեղում տնտեսագիտություն և կառավարում մասնագիտությունն է՝ 3837 մարդ։ Ագրոպարենային գիտությունների գծով բուհեր ընդուվել է 1635 հոգի, մշակույթ և արվեստ՝ 1240 հոգի։

Ի դեպ, ներկայացված ցանկից երևում է նաև մասնագիտություն/սեռ կապը։ Օրինակ, կրթություն և մանկավարժություն մասնագիտությունն ընտրած 1217-ից 1088-ը կանայք են։ Կանայք մեծամասնություն են կազմում նաև սոցիալական գիտությունների, առողջապահության, բնագիտության, հումանիտար գիտությունների, մշակույթի և արվեստի, սպասարկման ոլորտ գծով։

Փոխարենը՝ ֆիզիկամաթեմատիկական գիտությունների մասնագիտությամբ բուհ ընդունվածների մեծ մասը տղամարդիկ են (927-ից 591-ը)։ Կան նաև ընդգծված, այսպես ասած, տղամարդկային մասնագիտություններ, որոնց գծով բուհ ընդունվածների թվում կանայք շատ քիչ են (տրանսպորտային համակարգեր, էներգետիկա, էներգետիկական մեքենաշինություն և էլեկտրատեխնիկա) կամ ընդհանրապես չկան (օրինակ՝ մետալուրգիա, մեքենաշինություն և նյութերի մշակում)։

Ավելացնենք նաև, որ 2015 թվականին հայաստանյան բուհերն ավարտել են 12666 մարդ։ Այդ թվում՝ 2597 տնտեսագետ ու կառավարիչ, 1167 մանկավարժ, 706 մշակութաբան և այլն։

Իհարկե, հետաքրքիր կլիներ իմանալ՝ այս շրջանավարտներից որ մասին է հաջողվել աշխատանքի տեղավորվել և ինչ մասնագիտությամբ։ Սակայն, ցավոք, այդպիսի վիճակագրություն չկա։