Վաշինգտոնի հայ համայնքը Թուրքիայի դեսպանատան առջև բողոքի ցույց անցկացրեց
Վաշինգտոնի հայ համայնքը բողոքի ցույցի էր դուրս եկել ԱՄՆ-ում Թուրքիայի դեսպանատան առջեւ՝ պահանջելով ճանաչել Հայոց ցեղասպանությունը եւ արդարություն հաստատել: Ինչպես «Ամերիկայի Ձայն»-ին ասաց ցույցին ընտանիքով մասնակցող Վաշինգտոնի Հայ դատի գրասենյակի գործադիր տնօրեն Արամ Համբարյանը, բողոքի ցույցի մասնակիցները երեք ուղերձ են ցանկանում տեղ հասցնել.
«Թուրքիայի իշխանություններին, ի դեմս Էրդողանի, ցանկանում ենք ասել, որ արդարության համար պայքարը երբեք չենք դադարեցնելու: Հայ ժողովրդին ցանկանում ենք հավաստիացնել, որ միասնական ենք արդարության համար մեր պայքարում: Իսկ Ամերիկայի իշխանություններին ցանկանում ենք հաղորդել, որ եթե նրանք նույնիսկ տեղի տան Թուրքիայի ճնշումներին, մենք կոտրելու ենք այս պատնեշը»:
Նշենք, որ հայ ցուցարարների առջեւ, Թուրքիայի դեսպանատան դարպասների տակ իր ցույցն էր կազմակերպել ԱՄՆ-ի թուրք համայնքը: Փորձելով խլացնել Թուրքիային ամոթանք տվող հայ ցուցարարների բացականչությունները` թուրք համայնքի ներկայացուցիչները բարձր երաժշտություն էին միացրել, ինչը բարկացնում էր հայ ցուցարարներին: ԱՄՆ-ի թուրք համայնքի ներկայացուցիչների խոսքով, հայ եւ թուրք ժողովուրդներին անհրաժեշտ է ուղիղ բանակցել: Այս կարծիքի է Ամերիկայի թուրքական ընկերակցությունների համագումարի համանախագահ Գյունայ Էվինչը.
«Մենք մեր ցավն ենք հայտնում մեր եղբայր հայերին եւ կիսում ենք նրանց ցավը: Մենք հավատացած ենք, որ կարող ենք համաձայնել անցյալի փաստերի 90 տոկոսի շուրջ եւ կիսելով ցավը, մենք կարող ենք կիսել եւ ապագան, քանի որ մեր ապագան միասնական է»:
Թուրքիայի դեսպանատնից ցույցի հայ մասնակիցները երթով ուղեւորվեցին դեպի ԱՄՆ-ում Հայաստանի դեսպանատուն, որտեղ գտնվող խաչքարի մոտ անցան Ցեղասպանության զոհերի հիշատակի հարգանքի արարողությունը եւ միասնության ցույցը: Ելույթ ունենալով հավաքվածների առջեւ` Հայաստանի արտակարգ դեսպանորդ և լիազոր նախարար, ԱՄՆ-ում ՀՀ փոխդեսպան Հրաչյա Թաշչյանն ընդգծեց, որ Սփյուռքը մշտապես կանգնած է եղել Հայաստանի կողքին.
«Սփյուռքով է բազմապատկվում Հայաստանի ուժը, ամրապնդվում մեր կարողությունը եւ հաղթելու վճռականությունը»:
Վաշինգտոնի ցույցի ընթացքում քննադատություն էր հնչում նաեւ Միացյալ Նահանգների նախագահ Բարաք Օբամայի հասցեին, ով Մեծ Եղեռնի հետ կապված իր ամենամյա ուղերձում այս տարի եւս չօգտագործեց «ցեղասպանություն» բառը: Սակայն, ԱՄՆ-ի հայերի մի մասն ընդգծում է, որ ուղերձում հպարտանալով այն տարիներին ահազանգ բարձրացրած ԱՄՆ-ի դեսպան Հենրի Մորգենթաուով, նշելով «ցեղասպանություն» բառը կիրառության մեծ դրած Ռաֆայել Լեմկինի ներդրումը եւ Հայոց ցեղասպանությունը ճանաչած Հռոմի Ֆրանցիսկոս պապի դերը, Օբաման իր ուղերձում անուղղակիորեն ճանաչել է ցեղասպանությունն` առանց այդ բառն օգտագործելու:
Հիշեցնենք, Հայոց ցեղասպանությունը ճանաչել է ԱՄՆ-ի նախագահ Ռոնալդ Ռեյգանը 1981-ին: Հայերի ցեղասպանությունը ճանաչվել է նաեւ ԱՄՆ-ի Կոնգրեսի կողմից 1975, 1984 եւ 1996 թվականներին: Ամերիկայի Հայկական համագումարի գործադիր տնօրեն Բրայըն Արդունին հույս ունի, որ ԱՄՆ-ի առաջնորդների ապագա սերունդները նույնպես կճանաչեն Հայոց ցեղասպանությունը.
«Մենք ցանկանում ենք աշխատել այն ուղղությամբ, որ մեր ընտրյալ առաջնորդները հասկանան ցեղասպանության ճանաչման եւ կանխման կարեւորությունը եւ ճշմարտությունը բարձրաձայնելուց չքաշվեն»:
Հիշեցնենք, որ խոսելով Ամերիկայի ժողովրդի անունից` Բարաք Օբաման այս տարվա իր ուղերձում նշել էր.
«Այսօր մենք կանգնած ենք հայ ժողովրդի թիկունքին՝ հիշելու Մեծ Եղեռնի սարսափները ու հաստատելու ժողովրդավարության, խաղաղության, ու Հայաստանի բարգավաճման հանդեպ մեր հավատարմությունը»։
