Ինչո՞վ է պայմանավորված «Սնիկերս», «Մարս», «Թվիքս», «Քիթքաթ», և «Էմընդէմս» շոկոլադների գների կրկին բարձրացումը
«Սնիկերս», «Մարս», «Թվիքս», «Քիթքաթ», և «Էմընդէմս» շոկոլադների գները շարունակում են փոփոխությունների ենթարկվել: Չզարմանաք, եթե կրպակներում քաղցրավենիքի այս տեսակների գները բարձրացված տեսնեք:
Ինչպես հայտնի է, մի քանի ամիս առաջ վերոնշյալ շոկոլադե սալիկների գները կտրուկ իջան, ու դրան հստակ պարզաբանում չտրվեց: Եթե մինչև սեպտեմբեր ամիսը փոքր «սնիկերսի» գինը 250-270 դրամ էր, հոկտեմբեր ամսից այն դարձավ 190-200: Այդ նույնը վերաբերում է «Մարս», «Թվիքս», «Քիթքաթ», և «Էմընդէմս» շոկոլադե սալիկներին:
Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն այն ժամանակ ասել էր, որ այդ ուղղությամբ հանձնաժողովը մեծ ծավալի ուսումնասիրություններ է իրականացնում: Կրպակների սեփականատերերից շատերը դա կապում էին ԵՏՄ անդամ երկրներից, մասնավորապես՝ Ռուսաստանից եկող ապրանքի մաքսատուրքի վերացմամբ։ Սակայն, ի վերջո, հարցին հստակ պարզաբանում չտրվեց:
Այսօր արդեն տարբեր կրպակներում կարելի է հանդիպել այդ շոկոլադե սալիկների գների բարձրացում: Եթե այն ժամանակ «Պարմա» սուպերմարկետների ցանցում այս տեսակի շոկոալդե սալիկները 200 դրամ էին, հիմա արդեն դրանք արժեն 220 դրամ: Սուպերմարկետի մենեջերներից մեկը 168.am-ի հետ զրույցում ասաց, որ գինը ոչ թե իրենք են բարձրացրել, այլ ներկրողները: Գնի բարձրացում նկատվում է գրեթե բոլոր կրպակներում:
«Նոր Զովք» սուպերմարկետների ցանցի մենեջերը, որտեղ գները պահպանվել են, մեզ հետ զրույցում պարզաբանեց, որ իրենք կարողացել են նույն գնի մեջ տեղավորվել, բայց շոկոլադե սալիկներն իրենց նույնպես բարձրացված գնով են վաճառում:
168.am-ն այս առնչությամբ պարզաբանում խնդրեց ՏՄՊՊ մամուլի քարտուղար Գայանե Սահակյանից: Վերջինս ասաց, որ իրենք տեղյակ են խնդրից, ու հիմա հանձնաժողովն այդ ուղղությամբ ուսումնասիրություններ է անում:
«Երբ այդ արտադրատեսակների գները նվազեցին, հանձնաժողովն ուսումնասիրություն սկսեց, ուսումնասիրությունն ընթացքի մեջ է, ու մենք նաև տեղյակ ենք, որ որոշակիորեն գնային բարձրացումներ են եղել, այդ առնչությամբ հիմա հանձնաժողովը դիտարկումներ է կատարում: Տեղեկատվություն ենք պահանջել ներկրողներից գնային փոփոխությունների վերաբերյալ, և առաջիկայում շուտով մենք արդյունքները կներկայացնենք հանրությանը: Այսինքն՝ մեր ուսումնասիրությունը գրեթե մոտենում էր ավարտին, երբ բարձրացան գները: Հիմա մի քանի օր էլ մեզ անհրաժեշտ է այդ ուսումնասիրությունը վերջացնելու համար՝ պարզելու, թե բարձրացման պատճառը որն է, միգուցե ներկրման գների փոփոխությամբ է պայմանավորված, կամ միգուցե երկրորդային շուկայում է բարձրացումը տեղի ունեցել: Դա էլ հանձնաժողովը կպարզի, և մեր ուսումնասիրության արդյունքներն արդեն առաջիկայում կներկայացնենք հասարակությանը»,- նշեց ՏՄՊՊ մամուլի խոսնակը:
