«Ակտիվ քաղաքացիների ճնշող մեծամասնության կարծիքով՝ միայն բռնություններով, զենքով կարող է փոփոխություն տեղի ունենալ». Արմեն Մարտիրոսյանը՝ վնասազերծված խմբի մասին
Ինչպես հայտնի է, օրերս ՀՀ ԱԱԾ-ի կողմից ձերբակալվեցին «Հայրենիք և պատիվ» կուսակցության նախագահ Գառնիկ Մարգարյանը և «Եղվարդի մարզակոշիկների ֆաբրիկա» ԲԲ ընկերության հիմնական բաժնետեր Վլադիմիր Առաքելյանը, որոնց կասկածում են Արթուր Վարդանյանի կողմից ստեղծված հանցավոր համագործակցությանը մասնակցելու, կազմակերպված խմբի կազմում զենք և ռազմամթերք իրացնելու, պահելու մեջ: Այսօր արդեն նրանք կալանավորվել են:
Այս առնչությամբ 168.am-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ:
– Պարոն Մարտիրոսյան, հաշվի առնելով, թե մինչ օրս այս գործով ովքեր են ձերբակալվել, Ձեզ համար որոշակիանո՞ւմ է՝ ի՞նչ է տեղի ունենում, ու ի՞նչն է կապում այդ ձերբակալված մարդկանց:
– Ոչ, որևէ որոշակիություն ինձ մոտ չկա, կասկածները, ինչպես առաջին օրը, այնպես էլ հիմա, քանի գնում՝ խորանում են: Կարծես թե այս գործը սկսված է նրա համար, որ որոշ անձանց կամ խմբերի թիրախավորեն: Կարող է՝ ես դիլետանտություն եմ անում, համենայն դեպս, որքան զրուցել եմ ուժային կառույցների ներկայացուցիչների հետ, ընդհանրապես նմանատիպ դեպքերում, երբ ամիսներ շարունակ իրենց ուշադրության կենտրոնում են գտնվել, նրանք բոլոր կապերն են բացահայտում, թե ով՝ ում հետ է շփվում, և մեծածավալ ձերբակալությունների կարիք եթե լինում է, անմիջապես իրականացնում են, դա չենք տեսել, ամիսներ հետո մեկ էլ ինչ-որ հերթական աղմկոտ ձերբակալությունն է լինում:
Ակնհայտ է, որ Հայաստանում իշխանությունը լինելով ոչ լեգիտիմ՝ այնպիսի քայլեր է իրականացնում, որ թույլ չի տալիս երկրում փոփոխություններ, բարեփոխումներ տեղի ունենան խաղաղ ճանապարհով, ընտրական գործընթացների միջոցով, ու այսօր ակտիվ քաղաքացիների ճնշող մեծամասնությունն այն կարծիքն ունի, որ միայն բռնություններով, զենքով կարող է փոփոխություն տեղի ունենալ: Բայց նույնիսկ այդ դեպքում խնդիրը ոչ թե այն է, որ այդ անձինք անօրինականություն են անում, այլ իրենք փորձում են օրինականությունը վերականգնել, նույնիսկ, եթե իրենք փորձել են զենքով ինչ-որ բան անել, որը ես այս պահին բացառում եմ:
– Այսինքն՝ եթե անգամ պատրաստվել են զենքով որոշակի գործողություններ անել, նրանց չպե՞տք է թիրախավորեին ու ուշադրության կենտրոնում պահեին:
– Ես այդ զենքը կիրառելու թեզը չեմ ընդունում, չեմ հավատում, որովհետև, համենայն դեպս, մի քանիսին անձամբ եմ ճանաչում ու երբևիցե չեմ լսել իրենց կողմից բռնություններով, զենքով փոփոխություններ իրականացնելու տրամադրություն: Բայց եթե որևէ մեկը նմանատիպ քայլի դիմի, ապա դա իշխանությունների մեղքն է, որովհետև իրենք այլ ճանապարհ չեն թողնում: Ըստ էության, հասարակության մոտ այսպիսի պահանջ կա, իսկ յուրաքանչյուր պահանջարկ ցանկացած պարագայում նաև առաջարկ է ստանում: Այլ հարց է՝ ես ընդունո՞ւմ եմ այդ ճանապարհով փոփոխությունը, թե՞ ոչ: Ես չեմ ընդունում, որովհետև կարծում եմ՝ դա ավելի ծանր փոփոխությունների ճանապարհ է, քան այն, ինչ մենք ենք առաջարկում՝ խաղաղ անհնազանդությունը:
– Ձեզ համար տարօրինակ չէ՞ հենց այդ մարդկանց թիրախավորումը, եթե թիրախավորում է եղել, հաշվի առնելով, որ վերջին շրջանում նրանք այնքան էլ ակտիվ քաղաքական գործունեություն չեն ծավալել: Եթե թիրախավորելու լինեին, ավելի հավանական չէ՞, որ «Նոր Հայաստանի» անդամներին կթիրախավորեին, որոնք դեկտեմբերի 1-ից նախատեսում էին որոշակի գործընթաց սկսել:
– Իմիջիայլոց, սկզբում հենց այդպես էլ գնում էր, եթե ուշադիր եք եղել, առաջին օրը հենց մեր ուղղությամբ էր ընթանում, բայց քանի որ «Նոր Հայաստանի» անդամներն իսկապես քաղաքական գործունեություն են իրականացնում, որը նաև միջազգային գործընկերների կողմից է ընդունվել, և մեր պատկերացումները մեր միջազգային գործընկերներին փոխանցելով՝ նրանց աջակցությունն ենք ստացել, կարծում եմ՝ այդ հանգամանքը խանգարել է իշխանություններին: Մի փոքր դժվար է պատկերացնել, ասենք, Րաֆֆի Հովհաննիսյանին՝ ինչ-որ ահաբեկչական խմբավորման մաս կազմելուց:
– Բայց ձերբակալվածներն էլ այնքան ակտիվ չեն եղել վերջին շրջանում, որ իմաստ ունենար նրանց թիրախավորելը: Այդ դեպքում ո՞րն է պատճառը:
– Ինչ վերաբերում է գործիչներին, չեմ կարող բացատրել, որովհետև ինձ համար անհասկանալի է գործընթացն ինքնին ամբողջությամբ: Բազմաթիվ իքսեր կան ու ինֆորմացիա չկա այդ իքսերից որևէ մեկի հետ կապված, որպեսզի փորձես ինչ-որ մոդելավորում իրականացնել:
– Այսինքն՝ Դուք բացառո՞ւմ եք, օրինակ, որ Վահան Շիրխանյանը զենք է վաճառել, ինչպես մամուլում է շրջանառվում:
– Այսպես ասեմ՝ չեմ պատկերացնում:
– Փաստորեն, Ձեզ համար այս ամենն իշխանությունների կողմից բեմադրած ինչ-որ բա՞ն է:
– Բեմադրություն է թե ինչ՝ ժամանակը ցույց կտա, պարզ է, որ անտրամաբանական չէ, ինչ-որ նպատակի համար ծառայում է գործընթացը: Կարող է՝ հասարակության մի մասի մեջ ահաբեկում մտցնելու համար է, որոշակի զանգվածների վրա ազդելու համար, որ՝ ձեզ էլ կբռնենք, և այլն: Ակնհայտ է, որ Հայաստանում մի քանի տասնյակներից բաղկացած ահաբեկչական խումբ չի կարող լինել:
